Shillong, Naiwieng: U MLA ka Mawlai konstitwensi u bah PT Sawkmie ha ka 15 tarik mynta u bnai u la pynpaw ka jingsngewkmen hadien ba u la lah ban pynïoh ïa ka surok thymmai ka ban shna noh na Mawlai Umphrew sha Nongkohlew ïa kaba la mang T. 3 klur tam na ka bynta ban shna ïa ka surok ba 6 kilomitar eiei ka jingjrong ha ka jingdon ryngkat u rangbah shnong bah D. Sohshang, u rangbah shnong barim bah Elgin Langstieh, ki longkmie, ki heh PWD bad kiwei kiwei.
U bah Sawkmie u la ong ba watla ka dei tang na ka bynta ki nongshong shnong kiba don kumba 200 tam eiei ki longïing, hynrei kum u nongmihkhmat u don ka jingkitkhlieh na ka bynta ka roi ka par jong ka thaiñ bad um ju peit ban shimkhia tang sha ki jaka ba bun paid.
U ïathuh ba ha ka phase nyngkong kin tih shuwa ïa ka surok bud sa ka siang maw bad khatduh kin sa siang rong. Ha ka juh ka por ula kyrpad ïa ki kontraktor ban pyndep ïa ka jingtih bad siang maw hapoh u bnai Nohprah bad hapdeng jong kane un nang ïai buddien ban ïoh sa ïa ka mang tyngka na ka bynta ban siang rong.
Nalor kata u MLA u la pynpaw ruh ka jingsngewkhia ha kaba ïa dei bad ka surok ba la sniew na Mawsiatkhnam shaduh Lummawsing, Mawtawar kaba u la ïai buddien na ka por sha ka por bad u la kyrpad ïa ki kontraktor ba kin shna noh ïa ka.
Ha ka juh ka por u la kren ruh halor ka surok longround road ba naduh Mawlai petrol pump haduh Mawroh ha kaba u la ïakynduh bad uwei na ki kontraktor uba la kular ban shna noh ïa kane ka surok kaba la pynmad jingeh bha ïa u paidbah.
Ha kane ka sngi la ïoh ruh ka jingkren na u rangbah shnong, na bah Elgin bad na ka kong S. Kharshiing, kawei na ki nongshong shnong, kiba la ai khublei ïa kane ka jingshimkhia jong u MLA ka thaiñ.
