Pynïoh ka Clean Sohra Campaign bad ka DC ïa ka Waste recovery and Treatment Plant

Shillong, Naiwieng, 07: Kum shi bynta ban weng noh ïa ka jingeh kaba khraw ha ka thaiñ Sohra kaba ïadei bad ka jingbret ïa ki ñiut ki ñier uba mih na manla ki kyntoit ka thaiñ Sohra, ka kynhun Roral Enfield (Eicher group Foundation) na Nongbah Delhi, ka Kompeni kaba heh ha India ka la iuhkjat ban jurip ïa ka jaka kaba don ha Mawkyrdup, Sohra ha kaba yn sdang ban tei noh ïa ka Scientific Waste Recovery and Waste Treatment Plant, ka jaka ha kaba yn lum yn lang shipor, pynïakhlad ban pyndonkam biang ïa ki ñiut ki ñier ha la ki bynta bynta khnang ba ki kyntoit bad ki shnong bapher bapher kin ym leit shuh ban bret lane thang ïa ki niut jong ki ha ki lum, ki krem bad ki rudnong jong ka shnong lane thang kumba leh mynta.
Kane ka projek kaba la ïapynbeit hadpeng ka Clean Sohra Campaign bad ka ophis jong ka Deputy Commissioner, Shillong la sdang ban ïapyrkhat naduh u snem ba la lah bad ïa ka Detail Project Report (DPR) la pynkhreh da ka Swach Bharat Gramin Meghalaya. Ha ki bnai ba la dep ïa ka DPR ladep phah sha ka Royal Enfiled Eicher Group kaba long ka kopeni ka ban bei tyngka ïa ki jinglut jingsep katkum ka DPR ba la shna da ka Swach Bharat Gramin, Meghalaya
Kiba la wan jurip na ka liang jong ka Royal Enfiled (Eicher Group Foundation) ki long u Vigyat Singh, ka Hoinu Hazel bad ka Aveespa Gogoi ha kaba la ïadon lang ruh u Bah Alan West Kharkongor uba long u Chairman ka Clean Sohra Campaign, ki nongkitkam ka CSC, u Syiem Khynnah ka Hima Sohra, u Myntri Laplad Kynta bad u Bah Wanpher Shadap ka Urban Affairs Department jong ka Sorkar jylla.
Kumba ka long mynta ka Sohra ka ïakynduh ïa ka jingeh kaba khraw ha kaba ïadei bad ka jingbret ïa ki ñiut ki ñier kiba la sdang ban jyllei na ka daw jong ka jingroi sted ki shnong ki thaw bad ka jingroi jong ka kam jngoh kai pyrthei. Dang shen u Syiem ka Hima Sohra u la aiwai kumba 2 akar ka jaka ha Mawkyrdup sha ka Clean Sohra Campaign na ka bynta katei ka jingthmu da ka jingsngewthuh ba la donkam ban leh kyrkieh ban weng ïa kane ka jingeh.
Na ka liang jong u Vigyat Singh u la pynpaw ïa ka jingsngewhun hadien ba u la ïohi hi da la ka jong ka khmat ïa katei ka jaka bad ong ba lada ki kam baroh ki ïaid beit ïaid ryntih, ha shuwa ban kut une u snem yn sa lah ban sdang noh ïa ka jingtei ïa katei ka Waste Recovery and Waste Treatment Plant ha Mawkyrdup.
Kum ban shu pyntip ba kane ka projek kam dei kaba shu lum lymmuh ïa ki ñiut ki ñier, hynrei ka kynthup ïa ka jingpynïakhlad ïa ki barih ha la i jong i jong, ka jingpyndonkam biang ïa kiba lah, ka jingpynkylla sboh ïa ki ñiut, ka jingylliat ïa ki bad ka jingphah ruh ïa ki bym lah ban pyndonkam sha kiwei pat ki jaka kiba lah ban pyndonkam ïa ki. Kumtei katei ka projek kam dei ka ban shu lum ïa niut ha kawei ka jaka kumba long mynta hynrei leh ha kata ka rukom katkum ka jingstad saïan ka juk mynta.
U Bah Alan West Kharkongor u la ong ba ka don ruh ka jingthmu ban pynkylla ïa katei ka jaka sha ka Waste Park ha kaba yn lah ban buh ïa ka Waste Museum, ka Kper Syntiew bad Kper jhur ha kaba yn pyndonkam da ka sboh kaba mih nangne bad “Waste to Art space” ha kaba yn ailad ïa ki Artist ka thaiñ Sohra bad kiwei pat ki jaka ban pynohdur ïa ki katto katne ki mar ba la bret sha ki jingoh dur bakyrpang kiba wat ki nongjngokai pyrthei ruh ki lah ban wan peitkai.