Shillong Naiwieng 07: Ka tnad Public Works Department (Roads) shen kan sa pynbha noh ïa ki surok ba la sniew ha Mawlai hadien ba ka tnad Public Health Engineering (PHE) ka la pyndep ïa ka jingpyndait ïa ki pipe na ka bynta ban pynpoi um sha katei ka thaiñ.
Haba pyntip ïa kane, u Symbud Myntri Rangbah ka Jylla,Bah Prestone Tynsong u la ong ba ka sorkar ka la dep ban mang ruh na ka bynta ban siang rong ïa ka surok baroh kawei naduh Mawlai Petrol Pump haduh FCI ter ter naduh mynshem snem.
Shuh shuh u la pyntip ruh ba ka sorkar ka la dep ruh wat ban mang pisa na ka bynta ban pynitynnad ia ki lynti ïaid kjat ha shi lynter katei ka surok ruh.
Shuh shuh u la ïathuh ruh ba shwa ban sdang ka jingmaramot ia ka surok ka tnad ka la ïoh pdiang ïa ka jingkyrpad na ka tnad PHE ban ailad shwa ïa ki ban pynpoi bad pyndait ïa ki pipe ban pynpoi um ha katei ka thaiñ.
“Ngi la ong haoid ïa ka PHE hynrei ngi la phah pynstet ïa ka kam khnang ba ngin lah ban sdang noh ïa ka kam,” u la ong.
Ha kawei pat ka Liang u Symbud Myntri Rangbah u la ïathuh ba shen kin sa sdang noh ïa ka jingmaramot ïa ka surok National Highway – 6 naduh Mawryngkneng ter ter haduh Jowai.
U Bah Prestone u la ïathuh ba ïa ka DPR ka National Highway Authority of India (NHAI) ka la dep ban phah sha ka Ministry of Road Transport and Highways (MoRTH) na ka bynta katei ka surok kaba sdang na Mawryngkneng ha East Khasi Hills shaduh Jowai kaba ha West Jaintia Hills district.
“Shen ngin sa ïoh ïa ka mang pisa bad mar ïa ïoh yn sa khot noh ïa ka tender bad nga Kyrmen ba hapoh khyndiat bnai ngin sa lah ban pynbha ïa katei ka surok,” u la ong.
U Bah Prestone u la ïathuh ruh ba ka DPR ka kynthup lang ruh wat ïa ka Jowai Bypass sha 4th Mile kaba la sniew bha.