Jur ka jingkwah pynlong business ïa ka kam jied nongmihkhmat : Adelbert

Shillong, Naiwieng 07 : U MLA ka Shillong North, Bah Adelbert Nongrum ha ka sngi Nyngkong u la ong ba ka jingpynbiej ban ïoh vote mynta kam dei shuh tang ha ka constituency jong u hynrei ka la ïaid kylleng ki constituency namar baroh ki kwah ban pynlong business ïa ka hok jied nongmihkhmat ha ka jylla.
Halor ka jingdon bun ki kyrtong kiba pynkhreh mynta ban aireng na Shillong North, u Bah Adelbert u la ong, “Nga mih ban ïakhun ïa ka elekshon ym da ka bor pisa hynrei kadei beit da ka nongrim kaba khuid bad kaba shai.”
Nalorkata, da kaba kdew ba ka don ka jingïapher kaba jur haba ïadei bad ka elekshon ha u 2018 bad kane ka elekshon, utei u nongmihkhmat paidbah u la ong ba mynta ka kynti ki paidbah ki dei ban long kiba stad bad kiba shemphang ïano kin jied bad ïano kin pynjop kum u MLA jong ki namar bun ki wan tang ban pynbiej.
“Kiba bun ki wan tang na bynta ka jingmyntoi shimet jong ki. Ka jingpynbiej ban ïoh vote kam dei shuh tang ha constituency jongnga namar ka daw hi kadei ba ki kwah ban pynlong kam khaii wat ïa ka kam saiñhima sima ruh,” u la ong haba kren bad ki lad pathai khubor hadien ba la wai ka jingïalang.
Ha kajuh ka por, u Bah Adelbert u la pyntikna ruh ba shen un sa pynïasoh noh sha ka Voice of People’s Party (VPP) bad ïa kane un sa leh ha ka por kaba biang tam. “Nga hap ban ap ïa ka por kaba biang tam bad mynta baroh ki nongkyrshan jongnga ki la tip ba ngan sa leit pynïasoh sha ka VPP.”
Ka Shillong North kadei kawei na ki consti tuency kaba jan baroh ki party ki mih lut ban ïakhun kynthup naduh ka UDP, NPP, BJP bad ruh ka Congress.