Shillong, Naiwieng : Ka Dr H. Gordon Roberts Hospital, Jaïaw dang shen rakhe ïa ka jingdap 100 snem ban ai jingshakri ïa ki paidbah ha ka liang ka jingai jingsumar ha ka koit ka khiah.
Kane ka hospital kaba la pynïaid da ka Khasi Jaiñtia Presbyterian Assembly Synod ka la long ka shlem ai jingsumar kaba pynsuk haduh katta katta ïa ki paidbah ym tang hapoh ka nongbah Shillong hynrei wat ïa ki paidbah jong ki shnong nongkyndong.
Ha kane ka jingrakhe ïa kane ka jingdap 100 snem ka “Ktiews Trust” ka la pynkynmaw ïa kaei kaba ka la noh synñiang sha kane ka Hospital kaba la ai ka jingshakri sha ki paidbah ka jylla ban ai lem ka kti kamon kti kadiang bad ban ai kyrshan da ka jingïarap pisa kaba la kot jin 2 klur tyngka.
Ki kato katne kiba ka “Ktiews Trust” ka la noh synñiang sha kane ka Hospital ki long ka jingkyrshan ïa ka COVID Wards, ka ARI Clinic, ki mashin ban pyndonkam ha kamra kha khunlung, ka jingkyrshan ha kaba shna ïa ka iing ban pynkha khunlung, ka Advance Life Support Ambulance bad kiwei kiwei ki jingkyrshan.
Kine ki jingai jingïarap da ka Trust ïa kane ka Hospital ka la long ka jingkyrkhu kaba khraw ym tang ïa ki nong-pynïaid hynrei khamtam eh ïa ki paidbah kiba shah sumar ha kane ka Hospital.
U Bah Michael Kharsyntiew uba dei uwei na ki dkhot jong ka Ktiews Trust u la ong ba kine ki jingai jingïarap jong ka Trust sha ka Hospital ka long kum shi bynta ban ai ïa ka jingkyrshan sha ka Hospital kaba la ai ka jingshakri ïa ki paidbah ka jylla.
