Pynïasoh VPP u President barim ka HSPDP Youth Wing, u Volunteer Hill State bad bun kiwei

Shillong, Rymphang 08 : U President barim ka HSPDP, u Bah Sandondor Ryntathiang ryngkat kiba bun ki dkhot ka HSPDP na Sohïong bad Nongstoiñ, ki la pynïasoh noh bad ka Voice of the People Party(VPP) mynta ka sngi ha ophis jong ka VPP ha Lad Nongkrem.
Ka daw ba ki la ai haba mih noh na ka HSPDP ban rung sha ka VPP, ki la pynpaw ba kadei jingïohi ba ka Voice Of The People’s Party (VPP) ka ïeng ha ka nongrim ban shakri ïa u paidbah ha ka lynti kaba hok kaba khuid bad ban ai ka synshar ka khadar kaba khuid ba suba. Ha baroh la don kumba laiphew ngut ki nongkitkam ka Hills State People Democratic Party ban leit ban pynïasoh noh ïalade sha kane ka party.
Ki nongkitkam ka HSPDP kiba na Sohïong, Nongstoiñ bad kiwei de ki jaka ki la pynïasoh lang bad la pdiang sngewbha ïa ki da u President rangbah ka seng, u Bah Ardent Miller Basaïawmoit ha ryngkat ka jingïadonlang u MLA ka Mawlai, u bah Brightstarwell Marbaniang, u General Secretary uba dei ruh u kyrtong ban ïa aireng ïa ka elekshon sha ka ïing dorbar thawaiñ ka Lok Sabha, u Dr.Ricky AJ Syngkon, u Vice President, u Dr. Kara Chen nalor kiwei kiwei.
Na ka Liang u bah Ardent, u la ong, ba ka jingwan ban pynïohsoh jong ki sha ka party kadei beit halor ka nongrim jong ka party ym na bynta kano kano ka jingmyntoi shi met bad u la kyntu ba kin ïai neh ha ka nongrim.
Nalor kata, u la ong ruh ba kum ba ka thong ka party ka long ban pynmih ïa ki nongïalam kiban shim pateng ïa ka kam nongïalam kadei ka kamram ïaki ban sngap ïa ka jingïapyni ki nongïalam.
Napdeng ki la pynïasoh sha ka VPP mynta ka sngi la don lang ruh u Bah Thingdar Lyngdoh, uba long u Hill State Volunteer ne u nongïaleh hill state bad uwei na kiba la ïadon bynta ban seng ïa ka HSPDP.
U Bah Thingdar Lyngdoh mynta ka sngi haba kren ha ka jingïalang ban pynïasnoh ïalade sha ka party VPP hadien ba u la mih noh na ka party hynnin ka sngi na ka party HSPDP u la ong ba ka rai jong u ban ïasnoh bad ka party ka dei beit halor ki nongrim.
Ha ka jingkren u Bah Thingdar u la kren bynniaw ban ïohi ïa ka long ka man ka party bad ban sakhi ba na ki nongrim kiba u maieid u ju ïaid la kdat noh sha ka nongrim myntoi shimet da ki nongïalam kiba mynta.
U la ïathuh ruh ba kumno ha ki snem kiba la leit mynba ka dang jur ka jingdawa ïa ka jylla u la ïaid lynti wat haduh ba la pynlong ban sdang bat suloi.
U la ong ba ka long ka burom ïa u ban don bynta lang bad ka VPP ha kane ka kynti ban tei thymmai ïa ka jylla ïa ka lawei kaba shngaiñ hapoh ka jingïalam ki nongïalam ba don ka maiñ bad ka jingshemphang.