Shillong, Rymphang, 8: Ka United Hynñiewtrep Movement (UHM) ha ka sngi Palei ka la pan jingpynshai na ka Khasi Hills Autonomous District Council (KHADC) halor ka Bill kaba la mynjur ha kaba ïadei bad ka jingphah rejister ei ïa ki jaka jong ki paidbah kiba shong basah ha khappud ka Jylla Meghalaya bad Assam.
Ha ka jingïakynduh ïa u Dy. Chief Executive Member (Dy.CEM) ka Khasi Hills Autonomous District Council (KHADC) Bah Pynshngaiñ N. Syiem, ka seng hapoh ka jingïalam jong u President Bah Charlie J Rani ki la ïathuh ha u Dy. CEM katkum ka jingïakren jong ka seng bad u Symbud Myntri Rangbah ka jylla u Bah Prestone Tynsong u la kubur ba tnat District Council Affairs jong ka Sorkar Jylla ka ladep ban ai mynjur ïa kane ka Bill bad ka la phah biang sha ka District Council ban pynbit pynbiang.
Ha ka dorkhas ba la aiti sha u Deputy CEM, u Bah Rai u la ong ba ka seng ka kwah ïa ka jingpynshai ba haduh katno ladep ban pynbit pynbiang bad lano ban phah noh sha u Lat ka jylla khnang ban lah ban pynlong aiñ ïa ka.
U Bah Rani u la ong ba ka jingïakynduh ïa u Bah P N Syiem ka dei ruh kum ka jingdawa kaba la slem ha kaba ïadei bad u pud u sam hapdeng ka Meghalaya bad Assam.
U la ong ba hadien ba ka seng ka la leit sha ki thaiñ khappud ka la lap ba ka Assam ka ai ei khlem shim pisa ïa kito kiba kwah ban register jaka sha Assam, kumta ka seng ka kwah ba ka KHADC ruh kam dei ban shim pisa na ki briew kiba sah khappud kiba kwah ban register jaka sha ka jylla Meghalaya.
“Ha ka jingïakren bad u Deputy CEM u la ïathuh ba halor ki bai register jaka la pynhab la ka jong ka jong ka dor, hynrei ha kaba ïadei bad ka jingdawa ban pyllait ei ïa kiba sah ha khappud u Dy. CEM u la ong ba un sa rah sha ka Exexcutive Committee ban ïakren ïa kane ka kam. Kum ka seng ngin ym shong kli kti halor kane ka kam kaba kongsan hynrei ngin sa nang ïai buddien,” ong u Bah Rani.
U la ong ka seng ka la khmih lynti ba ka EC hapoh ka jingïalam jong u Bah Pynïaid Sing Syiem kum u CEM kin leh kham kloi ban shim ïa ka rai ban pyllait ei ïa ki briew kiba don jaka ha khappud ban pynrung kyrteng ïa ki jaka jong ki sha Meghalaya khnang ba ka jingïapynbeit pud hapdeng ka Meghalaya bad Assam kan suk bad kloi.
