Ka High Command ka don hangne, ngam donkam leit shabar jylla: Dr. Ampareen

Shillong, Rymphang 08 : Ka kyrtong MP jong ka National People’s Party (NPP), Dr. Ampareen Lyngdoh ka la pynpaw ïa ka jingkmen ba ka High Command jong ka party kadei na kane ka jylla hi bad kumta kam donkam ban leit shabar ka jylla ban ïa kren ïa ki kam jong ka party khamtam haba ïadei bad kane ka elekshon MP.
“Sngew donbok ba ka High Command ka dei na kane ka jylla jongngi hi, kumta ngam donkam ban leit sha kiwei pat ki jaka ban ïa kren ïa ki mat ïakhun elekshon ne manifesto kiban ym ïahap bad ka jylla jongnga,” ka la ong haba kren bad ki lad pathai khubor.
Shuh shuh ka la ong ba hadien ba ka party ka la pyllait ïa ka manifesto, kin sa kham shai shuh shuh namar kum ka kyrtong kam lah ban trei palat ïa ka rai jong ka high command.
Ka pynpaw ruh ïa ka jingkyrmen ba ka manifesto committee kin pynstet ïa ka kam namar katei ruh kadei ka bynta kaba kongsan tam ba kum ka kyrtong ka lah ban ïaid shakhmat ïa ka kam.
Haba jubab halor ka jingkylli, kane ka longkmie kaba dei ruh ka Myntri ka tnad ka Koit ka Khiah ka la pynpaw ba ka hap ban sdang ban treikam kum ka MP kaba lait ha kano kano ka por, kaba lah ban ïohi, kaba kloi ban ïohsngew.
Ka ong ruh ba lada ka MP kadei na ka Liang Synshar kan kham suk shuh shuh ka rukom treikam bad ki paidbah nongshong shnong ka jylla.
Haba kren pat halor ka jingmih bun ki kyrtong kiba kam ba ki la dei kiba paka, ka Myntri ka la kubur ba kadei ka jingshisha ba ki kyrtong kiba mih mynta ki la kham biang tangba kane kam mut pat ba ki kyrtong MP kiba mih mynshwa kim dei kiba biang.
“Hynrei nga tip ba da ka jingwan ka technology bad ba ïa ki jingshisha baroh kiba jïa ha ka ri phi lah ban lut tang da kaba shu ñion ïa u budam, kumta nga sngew ba nga kham pher na ki nalor ba nga dei kaba trei shitom, nga long kaba kloi bad phi lah ban ïohi ïanga kylleng bad phin ïai bteng ban ïohi ïanga man ki jaka,” ka la ong.
Nalorkata, ka ong ruh ba kane kadei ka thong treikam jong ka bad kam kwah satia ban ïakren ïa ki paidbah na shilliang lum hynrei ban don hajan bad kan ïai bteng ïa kane ka kam ban shakri ïa ki paidbah.
“Kam mut satia ba tang ba la long MP yn treikam beit na Delhi, hynrei ki MP ki lah ban ai jingmut ïa ka sorkar jylla halor ki phang kiba ym don satia ba poi kynmaw ne kiban kdew.”
Shwa kane ka la ïathuh ba ka la dep ban leit ïalap elekshon haduh kumba 10 tylli ki block bad kumba 67 tylli ki shnong tang ha kine ki khyndiat por.