Jowai, Rymphang, 8: Ka seng Nongrep War Jaiñtia, Amlarem ka la dawa ïa ka Sorkar Jylla ba kan pynkiew ïa ka dor jong ki mar rep kum u synsar, u kwai, u tympew bad kiwei kiwei ki mar rep namar ka jinghiar dor jong ki mar rep kaba la wanrah ïa ka jingduhnong ïa ki nongrep.
Kane ka seng jong ki nongrep dang shen ka la pynlong ïa ka jingïalang paidbah ha Amlarem, West Jaiñtia Hills bad ka la rai ban kyrpad ïa ka Sorkar lyngba u MLA ka Amlarem Constituency u Bah Lahkmen Rymbui uba long u Chief Adviser jong ka Sorkar Jylla ba kin wad ki lad ki lynti ban pynkiew dor ïa ki mar rep synsar ba la pynmih na ka thaiñ Riwar.
Kumba long mynta, ki nongrep ki la ïakynduh ïa kane ka jingeh ki la rai ban pynsngew sha u Sorkar MDA ba la ïalam da u Conrad K. Sangma kum u Myntri Rangbah ba ka thawlad ha kine hi ki sngi khnang ba ki nongrep synsar, kwai, tympew bad kiwei kiwei ki mar rep kin ïaid ïew ha ka dor kaba biang khnang ba ki nongrep kin kham ïoh jingmyntoi ha ka rep ka riang hapoh ka thaiñ War Jaiñtia.
La pynsngew ruh ba mynta u synsar u la hiar dor shaba palat bad kumjuh u kwai bad u tympew bad kiwei kiwei ki mar rep kiba ha War Jaiñtia 80 na ka 100 ki briew ki im jakpoh ha kaba trei shitom da kaba rep ïa u synsar ha ki khlaw ki btap bad kumjuh ruh ïa u kwai u tympew bad kiwei kiwei ki mar rep kiba ai jingmyntoi shibun ïa ki nongrep ha ka thaiñ.
Ki nongrep ki la kyrpad ïa ka Sorkar ba kan weng noh ïa ka jingoh khajna ïa ki mar rep ha shilynter ka surokbah Jowai-Shillong lyngba ka District Council namarba kane ka ktah shibun ïa ki nongrep, la pynsngew u Secretary ka Seng ki Nongrep War Jaiñtia, Amlarem u Bah Sumer Syngkor bad u President u Bah Kolmen Pohshna.
