Plie u Myntri Rangbah ïa ka karkhana saiñ sohphan ha Rongara
Naduh Russia bad Europe ki la phah buh lypa
Shillong, Rymphang 08 : U Myntri Rangbah ka jylla, Conrad K Sangma ha ka sngi Palei u la plie paidbah ïa ka karkhana saiñ sohphan ha Gulpani Nokat kaba don ha Rongara, South Garo Hills ha ryngkat ka jingdonlang u Myntri ka tnad Pule Puthi bad MLA ka thaiñ u Rakkam A Sangma bad ruh u MLA ka Baghmara bad Chairman MGCC u Kartush Marak nalor kiwei kiwei.
Haba kren ha ka jingïalang, u Myntri Rangbah u la pynpaw ïa ka jingkmen ba ki la ïoh ban plie ïa katei ka karkhana ban saiñ ïa u sohphan. U ong ruh ba kum kitei ki processing unit kam dei ban kut tang ha u sohphan hynrei ka sorkar jylla ka buh thong ban don wat ïa ki karkhana na bynta kiwei ki jait soh bad ki jhur ba mih na ka thaiñ.
U Myntri Rangbah u la ong ba kum ka Meghalaya kaba don bun bha ki jait soh kiba mih ha ki samoi bapher bapher kumjuh ruh ki jhur ki paid nongrep kim ju ïoh ban kamai bun na kine ki mar rep bad bun ki la shu pyut bad duh ei.
“Kumta, ngi la sdang bun bha ki prokram ha ka dur jong ka Mission Mode khnang ba ki nongrep kin ïoh ban kamai arshah lyngba kane ka sienjam kumba leh ïa u Lakadong Mission, Ginger Mission, kumta kane ka jackfruit mission ruh kan plie lad ïa ki nongrep ban kamai kham bha ha ki nongkyndong.
“Ngi la sdang bun ki prokram ha ka dur jong ka mission mode khnang ba ki nongrep kin lah ban kamai arshah lyngba ki mar rep kiba la saiñ bad pynbit pynbiang bha kumba leh ïa u shynrai, sying bad mynta kumjuh ïa u sohphan,” ong u Myntri Rangbah.
U la ïathuh ba ïa katei ka jackfruit processing unit la shna ha ka jinglut kaba kot sha ka 2klur tyngka bad la pynïaid ïa kalyngba ka bording na ka sngi kaba don haduh 100 KW solar power unit.
U la ong ruh ba ha ka por ba ih u sohphan ka jingthied ïa utei u soh kan poi beit haduh 1.5 lak haduh 2 lak tyngka man ka sngi na ki paidbah bad hadien kane yn sa saiñ pat ïa u ha shwa ban song bad pynïaid iew sha kiwei pat ki iew ha ka dur jong ki sohphan ba la sdieng tyrkhong (chip), jam sohphan bad kiwei kiwei. Nalor kine yn ai jinghikai ruh ïa kumba 150 ngut ki longkmie ha katei ka unit kumno ban saiñ, ban song bad ban pynbit pynbiang.
“Nga sngewkmen ban pyntip ïaphi ba ki la don ruh naduh Europe bad Russia kiba la phah buh lypa ïa ki jingbam ba shna na u sohphan. Kane ka la dei shisha ka jingkmen bad ka jingsngew sarong ïangi baroh,” u la ong.