Shillong, Nohprah, 15: Kum shibynta ban kyntiew ïa ki Self Help Group (SHG) jong ka jylla, ka Meghalaya State Rural Livelihoods Society (MSRLS) ryngkat ka jingïatreilang bad ka Usha Silai, ki la pynlong ïa ka 5th Meghalaya Saras Aajeevika Fair kaba la sdang naduh ka 5 tarik u Nohprah, 2024 bad ïa kaba yn sa pynkut ha ka 15tarik, Nohprah,2024.
Ha ka jingpynlong ïa kane ka iew tamasa ha Ratson Ground kaba don ha ka shnong Mawïongrim, Shillong ki don bun tylli ki kynhun Self Help Group kiba la pyni ïa ki sap shna jingshna da ki kti ban pynïaid iew ha kylleng ka jylla.
Ha ka sngi Thohdieng, ka Meghalaya State Rural Livelihoods Society lem bad ka Usha Silai ki la pynlong ruh ïa ka jingpyniriam ne ka Fashion Show ha kaba la ïashim bynta da ki dkhot jong ki Self Help Group bad ïa ki jaiñ ba la phong da ki nongshim bynta la pynbit pynbiang ne suh pynwan dur hi da ki dkhot jong kine ki Self Help Group.
La sakhi ïa kane ka jingpyni riam da u Principal Secretary ka tnat Textile ka Sorkar Jylla u Bah Fredrick Roy Kharkongor uba la long kum u kongsan, ryngkat ka jingdonlang jong u Chief Executive Officer (CEO) ka Meghalaya State Rural Livelihoods Society (MSRLS) u Ch. Ramakrishna, u Regional Manager jong ka Usha International Limited u Saikat Nassar bad kiwei kiwei.
Kum ka jingithuh ïa kine ki Self Help Group kiba ïashim bynta ha kane ka iew tamasa u kongsan bad ki kynrem ki lyndan ki la sam ruh ïa ki syrnot sha ki dkhot jong ki Self Help Group.
