Tura Kyllalyngkot 15 : Ka President jongka ri India ka Droupadi Murmu ka la pyni nuksa ïa ka mynsiem sngewrit bad mynsiem riewlum ha ka jingplie ïa ka Meghalaya Games kaba 5 ha Tura namar hadien ba ka la dep ai jingkren, dep pynher ïa ka lama bad plie ïa kane ka jingïalehkai bad leit shong sha ka jaka shong. Hynrei kyndit kyndit joit ka la ïeng biang na ka jaka shong bad kiew sha rynsan.
Kane ka jingleh jongka ka la pynkyndit ïa ki nongïalehkai, ki Kynhun Shad Tynrai bad ki paidbah kiba dang ang ïa ki balloon ba ka pynher kum ka dak ka jingplie ïa kane ka Meghalaya Games haba ki la ïoh sngew ba u nongpynïaid ïa ka jingïalang u phah ban pynheh biang ïa u Microphone bad ki ïohi ba ka President ka ïeng biang ha rynsan.
Ka daw ka long ba kan kren sngewnguh bad ai khublei ïa baroh ki Nongïalehkai sport, ki Kynhun Shad Tynrai namar ka la ïoh jingtip ba wat khlem ki jaiñ ki nep kiba syaid ki la ïeng beit thik ha madan haduh kumba 3-4 kynta hapdeng ki jingkhriat jongka miet khlem da khih ban ap tad haduh ban da kut ka prokram ban plie ka President ïa kane ka jingialehkai sport. Haba kren ai khublei ïa ki rang bad ki thei ïalehkai bad ki kynhun shad tynrai ka la ong “ Kane ka dei ka mynsiem jong ki nongïalehkai ba shisha, ki khlur kiba dang samla bad ka snam kaba dang samla bad ka mynsiem kaba dang lung bad dang rhem”.
Wat la kane ka jingleh ka President ka long kaba rit hynrei ka la ai mynsiem pat ïa ki paid riewlum ym tang jong kane ka jylla hynrei jong kane ka thaiñ hi baroh kawei namar kum ka riewlum ba nyngkong ban long President ka da pynpaw shisha ïa ka mynsiem jinglong riewlum bad jingsngewrit jongka.
