Tura, K’lyngkot 15 : Ka President jongka Ri ka Droupadi Murmu ka la leit buh syntiew ban kynmaw burom ïa u (L) PA Sangma, MP bad Lamphang barim ka Lok Sabha bad Kpa u Myntri Rangbah ka Jylla Conrad K Sangma, mynta ka Lah Sngi U Blei ha Tura.
La synran ïa ka President da u Lat ka Jylla u Phagu Chauhan, u Myntri Rangbah ka Jylla Conrad K Sangma, MP ka Tura ka Agatha K Sangma, u Myntri barim ki kam pohiing ka Jylla u James K Sangma bad ka Kmie u Myntri Rangbah Soradini K Sangma.
Ka President Murmu ka la wan poi ha Baljek Airport kaba don ha Jengjal, West Garo Hills mynta ka janmiet ban plie paidbah ïa ka Meghalaya Games 2024 kaba San.
ïa ka President la pdiang sngewbha da u Lat ka Jylla, u Myntri Rangbah ka Jylla bad u Myntri ka tnad pule puthi u Rakkam Sangma nalor ki kynrem ki lyndan.
Kane ka jingwan ïuhkjat ka President ka long kaba kongsan tam namar ka dei ruh kaba mihkhmat na ka Jaidbynriew Riewlum. Ka dei ka President ba nyngkong eh jong ka Ri India ka ban sahmiet ha Tura.
Kane ka dei ruh ka sien ba nyngkong ha ki sanphew snem ba ïa ka Meghalaya Games la pynlong shabar jong ka Nongbah Shillong.
