Bluit mih sa ka Kong Finela, pynbna ba kwah ïakhun elekshon MP na ka BJP

Shillong, K’Lyngkot 15 : Ka nongsaid-aiñ ba la pawkhmat bha na ka jylla, Kong Finela Lyngdoh Nonglait ha ka sngi Nyngkong ka la pynbna ba ka la pynkhreh ïalade ban aireng ha kane ka elekshon MP na ka party Bharatiya Janata Party (BJP) na Shillong Parliamentary seat.
Haba kren bad ki lad pathai khubor, ka Kong Finela ka la ïathuh ba kum ka jingpynkhreh na ka bynta kane ka lympung ka la leit ban pynïasoh sha ka BJP ha ka 22tarik u Nohprah, 2023.
“Dang khyndiat por mynshwa haba nga kynduh ïa ki nongïalam ka BJP ha ka jylla kiba wan ban tyrwa ba ngan ïakhun ïa kane ka elekshon MP, nga la ong ba ngam sngewkwah shuh ïa mynta hi ban don ha ka saiñpyrthei nalor ba ngam pat dei ka dkhot ha ka party kumta ngam don eiei ban ong halor kata. Hynrei nga la kyndit ha katei ka sngi ba ki wan ban tyrwa ba ngan aireng na Shillong seat,” kala ïathuh haba kren bad ki lad pathai khubor ha ophis treikam jongka.
Nalorkata, ka ïathuh ruh ba kum ka longkmie kaba la don bynta ruh ha ka saiñpyrthei ha ki 10snem mynshwa, ka la long kaba pynkhreh ban ïakhun na ka BJP halor ki kyndon kiba ka la buh haki nongïalam BJP, kata halor ka nongrim ban ïakhun ïa ki bill kiba dang sahkut mynta ha Parliament kiba lah ban ktah ïa ka jaidbynriew rit paid lada ki la ïoh ban long aiñ.
“Ngi tip ba 100 persen ba kitei ki bill ba dang sahkut kin sa long aiñ ynda la wan biang ka sorkar thymmai,” ka la ong.
Kumta, ka la ïathuh ba ka la dep pynpaw ha ki nongïalam BJP ba kan aireng ha kane ka elekshon MP tang lada ki kular ba ïa ka hok jong ki ritpaid bad ki trai muluk trai jaka la ïada lada jia ba ka party ka wan biang ha ka bor ha ka sorkar pdeng.
Shuh shuh ka ong ruh ba ki Khasi ki don la ka jong ka rukom bat khyndew kaba kyrpng kaba ka sorkar pdeng kam dei satia ban tuklar. “Lada jia ba la mynjur ïa ka Land Acquisition Act kan sa pynïap noh ïa ka Land Transfer Act jong ka jylla bad kumta ngi la dei ban ïada lypa,” ka la bynrap shuh shuh.
Haba kren pat halor ka Uniform Civil Code (UCC), ka la ong ba haduh mynta wat ka draft document jong ka UCC ruh kam pat long paidbah kumta ym pat lah ban tip kumno bad hakano ka rukon kan don jingktah neem ïa ka jylla. Tangba ka ong pat, ba lada ka UCC ka long ain, kin don beit ki kyndon kiba lah ban pyllait ïa ka jylla kumba long ka Indian Penal Code ha kaba ka section 506 kam treikam satia hangne.
Ka Kong Finela ka la pynpaw ruh ba ka mat kaba hakhmat eh ba ka mih bad rai ban aireng naka party BJP ha kane ka elekshon ka long ha ka kyrteng kum ka khun khristan bad kum ka rit paid.
“Ngi donkam ban long ka sur jong ki khristan, ki rit paid ha Parliament na ka bynta kito kiba kynduh ïa ki jingeh bad jingjynjar,” ka la ong. Da kaba kam ba kan ym kynran dien satia, ka la rai ruh bakan trei shitom ban pynsngewthuh ïa ki paidbah ïa ki mat bad ki thong treikam kiba ka kwah ban leh lada ki paidbah ki shaniah ha ka.