Pynher shithi ka BJP West Jaiñtia sha u Modi ba ieh shrah ïa ka surok Myntriang-Saipung sha Assam

Jowai, K’Lyngkot, 05: Ka Bharatiya Janatha Party (BJP) West Jaiñtia Hills District lyngba u dkhot jong ka BJP State Meghalaya Shangpung Moolibang WJHD Laskeiñ Block u Bah Emjingmut Law ka la phah da ka jingthoh sha u Myntri Rangbah duh ka Ri u Narendra Modi halor ka surok kaba pynïasoh ïa ka shnong na Myntriang-Sumer Saipung C&RD Block East Jaiñtia Hills kaba pynïasoh shaduh Halflong jong ka jylla Assam.
Katkum ka shithi, u Bah Law ula pynsngew ba ka surok ka long shisha u budlum ïa ka roi ka par jong ki nongshong shnong jong ka thaiñ naduh ka rukom pynpoi ïa ki mar ki mata bad kumjuh ïa ka leit ka wan jong ki kali.
U Bah Law ula ong ïa ka surok ka Sorkar ka la shu ieh shrah da ki phew phew snem bad kane ka la buh jingeh ïa ki paidbah nongshong shnong kiba im ha kitei ki thaiñ. U la ong, lada ka Sorkar ka shimkhia ban pyntrei noh ïa ka surok kan wanrah ka jingsuk kaba khraw eh ïa ki nongleit nongwan lyngba ka surok na West sha East Jaiñtia Hills lyngba ka surok Shangpung-Sutnga.
Kumba long mynta ha kane ka surok kaba pynïasoh na Myntriang shaduh Sumer Saipung kaba hap hapoh ka 5-Sutnga Saipung Constituency ka don ka jingkieng ha ki bynta ka wah Kerkhah kaba don ha ka jingheh kumba 4649 miter, hynrei kane ka jingkieng kala don hapdeng ka jingsynjor bad ka jingsniew.
U Bah Law u la pyntip ïa kane ka jingujor halor ka surok ladep ban phah shithi kumjuh sha ki Myntri Sorkar jong ka jylla kynthup ïa u Bah Sniawbhalang Dhar ha u snem 2016 bad kumjuh sha u Bah Prestone Tyngsong ha u snem 2018 na ka bynta ba kin shimkhia ban pynbha noh ïa ka surok hynrei haduh mynta ym pat ïohi eiei ïa ki dak ki shim ban pyntrei ïa ka kam.
Halor kane u Bah Law u la kyntu lyngba kane ka jingthoh ba la phah sha u Myntri Rangbahduh ka Ri ba ka Sorkar ka dei ban shimkhia bad ban leh noh ïa kaba donkam khnang ban pynsuk ka leit ka wan jong kiba bun balang.