Mawkyrwat, K’lyngkot 05: U Professor Lakhon Kma ha ka sngi saitjaiñ u la pynskhem ïa ki nongkitkam jong kawei ka seng thymmai hapoh ka South West Khasi Hills District kaba la tip kum kyrteng kum ka Mawkyrwat Socio-Economic & People Development Forum (MSEPDF) da kaba buh ruh ïa ka phang, “ïarap mar kylliang bad shaniah ha U Blei” ne “Help one another and Trust in God”.
Ha kane ka jingïalang kaba la long ha Mawlangwir, South West Khasi Hills District la pynskhem ïa ki nongkitkam da u Professor Lakhon Kma ha kaba u Bah Daros Ramsiej u la shah jied ban shimti kum u President bad u Bah Brightstar Wanniang kum u General Secretary.
Ym tang kata, la pynskhem ïa ki nongkitkam jong ka Women’s Wing ha kaba la jied President ïa ka kong Ibanrilang Ïawphniaw bad General Secretary ka kong Bahuntngenlang Ïawphniaw.
U Professor Lakhon Kma hadien ka jingpynskhem u la ai ruh ki kyntien sneng kyntu kynpham bad ka jingkitbok kit-rwiang ïa ki nongïalam bad ki dkhot ha kaba la ïoh nongïalam bad kiwei de ki nongkitkam ba hakhmat na ki dong bapher bapher bad ruh na ka bynta ki shnat treikam jong ki kynthei jong kane ka seng.
U Bah Daros Ramsiej kum u President ba thymmai jong ka Forum u la ong ba ka jingpynlong ïa kane ka kynhun ka long kum shi bynta ban khmih bniah ïa ki rukom trei na ka bynta ki kam pynroi hapoh ka South West Khasi Hills District bad kumjuh ruh ban ïarap ïa kiba shem jingeh jingjynjar ha thaiñ baroh kawei.
