Shillong, K’ Lyngkot 05: Ki kali bad ki thuk thuk kiba niah khlem akor ha ki surok, na ka liang ka Shillong Traffic Police ka la sdang ban khynra bad talasi naphang bad ha ka juh ka por ki la maham kin pynduh noh ia ki laisen niah kali jong ki halor ka jingniah kali kaba pynthut bad pynshong syier ia kiba iaid ba ieng.
Ha kine ki sngi ba ki la pynlong ia ki jingtalasi bad khynra ia ki kali ar shaka kiba ym don ki registration number lane kito ki bym lah ruh ban iohi da ki khmat, kiba donkti ha ki kam ialeh race da kaba pynher sted ia ki thuk thuk ha ki kynta ki bym dei ban leh ia kane ka kam na ka liang ki pulit ki la shain kuna bad ki la shah khynra, ong ki pulit ka STP.
Kum kine ki jingkhynra la leh ruh ia ki thuk thuk kiba pynthymmai ia ki exhaust pipe khnang ban tehlakam ia ka jingjur ki jingsawa kiba mih na ki kali ar shaka.
Ki kali kiba dei ki ar shaka bad kumjuh ruh ki saw shaka kiba la pyndait da ki exhaust pipe kiiba sawa jam, kin ngat ha ki jingshah pynshitom kaba long katkum ka kyndon jong ka Section 182A (4)/190(2) of Motor Vehicle Act, 1988.
