Pynhap pyrda u ma Wailadmiki ïa ka Tynre Youth Elite League 2026

0

Jowai, Naiwieng 15: Ka lympung ïalehkai phutbol kaba la tip kum ka Tynre Youth Elite League 2026, kaba la pynïaid da ka Tynre Sports & Entertainment Society (TSES), ka la poi sha kaba kut ha ka sngi Saitjaiñ (14.11.2026), ha kaba ki kynhun kiba la poi sha ka Final ki long ka Booza FC pyrshah ïa ka Red Bull FC, ïa kaba la pynlong ha Green Galaxy Fustal Park, Mookynphad Mihmyntdu, West Jaiñtia Hills District.
U myntri ka tnat ki kam ïalehkai Sports bad kiwei u ma Wailadmiki Shylla ula wan ban pynhap pyrda ïa kane ka lympung, kaba la wan ban ïashim bynta haduh 30 tylli ki kynhun na ki District bapher bapher jong ka jylla. Ha kane ka juh ka sngi u ma Wailad u la plie paidbah ruh ïa ka ‘Tynre Football Academy’.
Kum ban shu pynkynmaw kane ka dei ka sien kaba ar ka TSES ka la pynlong ïa kum kane ka jingïalehkai phutbol. Ka TSES ka dei ruh ka Society kaba la buh ïa ka thong ban kyntiew ïa ki kam ïalehkai Sports bapher bapher na ka bynta ki kynnah bad ki samla hapoh ka thaiñ.
Ka jingïakhun phainal mynta ka sngi, ka la long kaba itynnad bad kaba ïakhaid bha ha kaba ka jingïalehkai ka la pynshongshit bad pynsngew tynnad ruh ïa ki paidbah nongpeitkai. Ha ka jingïakhun na ka liang ka Booza FC ka la lah ban pynliem ïa ka Red Bull FC 3-1 kol.
Haba ai jingkren kum u kongsan, u bah Wailad u la ïaroh bad ai mynsiem ïa ki nong-pynïaid bad ki nongkitkam ka TSES, kaba la wan sha khmat ban shim ïa kane ka lynti kaba long ka shlem ban kyntiew ïa ki kynnah bad samla ha ka jing-ïadei bad ki kam ïalehkai bad u dap da ka jingkmen ban ïohi ba mih kum kine ki Society ne ki Academy kiba ai jinghikai bad ïarap ïa ki khyn-nah bad samla ha ka liang ka sports.
Shuh shuh u la ong ba na ka liang ka sorkar ka la thaw ruh ïa ki grass-root center bapher bapher bad lyngba ka Chief Minister Football Mission kumba long mynta la don haduh 125 tylli ki Grassroot football center bad haba don kum kine ki center la ïohi ba la mih shibun ki khynnah samla napoh ka jylla kiba ba don ka sap ka phong ha ki jingïalehkai Sports.
ïa ka nam Best Goal Keeper la ïoh da u Damehipaya Suchen na ka kynhun jong ka Forward Ahead, top Scorer of the Tournament la ïoh da u Formy Phawa, ïa ka nam Player of the Match la ïoh da u Jadson Dohling, katba ïa ka nam Player of the Tournament la ïoh da u Ebennazer Nongrang.

Leave A Reply

Your email address will not be published.