NTPC Senior National Archery C’ship: Khur takma ksiar ka Pratibha Kandara bad u Gursehaj Singh Sandhu ha ka Indian Round
SHILLONG, Naiwieng 14: Ka Pratibha Kandara kaba dang 13 snem na Rajasthan bad u Gursehaj Singh Sandhu na Punjab ki la khur ïa ka takma ksiar ha ka ïakop siatkhnam Indian Round jong ki kynthei bad shynrang ha ka lympung NTPC Senior National Archery Championship ha madan Umsawli, ha ka sngi Saitjaiñ.
ïa kane ka jingïakop la pynlong da ka Archery Association of Meghalaya hapoh ka jingpeit jong ka Archery Association of India.
Ha ka Indian Round jong ki shynrang, u Sandhu u la tam 5 point ïa u Solagam Sambasiva ka Andhra Pradesh ha ka series ba nyngkong. Nangta u la siat ban kamai 347 point, ka point kaba heh tam ha ka series kaba ar, ban ïakhaid 686 bad khur ïa ka takma ksiar. U Gaurav Sanjay Chandane jong ka All India Police Sports Control Board u la khur takma rnong da 684.
Ha ka jingïakhun jong ki kynthei, ka Kandara ka la kamai 331 bad 330 na ka bynta ban kynjoh 661 point. Ka Bhawna Rani na Punjab ka la weng ïa ka jingshah tam point da kaba kamai 333 ha ka series kaba ar ban ïakhaid da 661 bad khur ïa ka takma rupa. Ka Dipika Pandey ka la khur ïa ka takma rnong da 659 point.
Na ka bynta ka Meghalaya, u Remedy Nongpluh ba 18-snem, u la kamai 659 point ban pyndep ha ka kyrdan ba 21 ha ka jingïakhun ki shynrang, da kaba duna tang 2 point ban don ha ka thup Top 20. Ka Dayaka Sohbar, 19 snem, ka la kamai 625 point bad pyndep ha ka kyrdan ba 26. Ryngkat lang, kine ki shijur ki la kamai 1,284 point ban buh ïa ka Meghalaya ha ka kyrdan ba 14 ha ka Mixed team qualification.