Mawkyrwat, Lber 12: Ka Young Pirates ka la ïoh ban pynhap pyrda noh ïa ka lympung ïalehkai kynjatbol kaba la tip kum ka 1st T.L. Pariong Memorial Football Tournament 2024 ha kaba ka Ïawpaw Football Club bad ka Thiepdiengan Football Club ki la poi sha ka phainal.
Lah ban kdew ba kane ka Young Pirates ka dei kawei na ki Seng Samla hapoh jong ka Seng Samla Shnong Rangthong, South West Khasi Hills District kaba la pynlong ïa kane ka jingïalehkai kum ka dak ka jingsah jingkynmaw ïa u babu T.L. Pariong uba la khlad noh bad uba dei u Myntri barim jong ka shnong Rangthong uba la noh synniang shibun ïa ka shnong ka thaw mynba u dang don ha ka sla pyrthei.
Ha ka jingïalehkai phainal ka Ïawpaw Football Club ka la long ka lahduh, ha kaba ka la pynliem noh ïa ka thiepdiengan Football Club da 3 – 0 kol.
Ha kane ka sngi la ïadonlang ruh da u khun khatduh jong u babu T.L. Pariong, u Myntri jong ka shnong Rangthong, u bah Kitborlang Nongrem kum u kongsan uba ha ka juh ka por u dei u State President jong ka NPYF, lem bad kiwei kiwei de ki riew rangbah jong ka shnong.
