Leit kynduh u Secretary General ka NESA ïa u Myntri Rangbah ka Tripura

Shillong, Lber 12 : Ki nongïalam na ka North East Sports Association (NESA) ha ka 09 tarik mynta u bnai hapoh ka jingïalam jong u Bah John F Kharshïing, Secretary General, NESA ba dei ruh u Working President ka Meghalaya State Olympic Association ryngkat u Bamang Tago, Secretary General, Arunachal Pradesh Olympic Association ki la leit ban kynduh ïa u Prof (Dr.) Manik Saha, Myntri Rangbah ka Tripura bad ruh ïa u Myntri ka tnad Sport katei ka jylla, u Tinku Roy ban ïa syllok kumno ba ki nongïalehkai na katei ka jylla kin ïoh ban shim bynta ha ka 3rd North East Games 2024 kaban long ha Nagaland naduh ka 18tarik haduh 23tarik Lber, 2024.
Ha kane ka jingïakyn duh la donlang ruh ki ophisar na ka tnad Sports jong ka Tripura, nangta ki nongïalam jong ka Tripura State Olympic Association bad ka Tripura Olympic Association nangta ka Tripura Sports Council nalor kiwei kiwei.
Katkum ka kyrwoh la ïathuh ba katei ka jingleit kynduh kadei hadien ba ka NESA ka la shim ïa ka rai ban phah da katei ka kynhun ban leit jurip bad leit sngap ïa ka jingeh kiba mih ha katei ka jylla namar ki don haduh ar kynhun hapoh ka jylla kiba ïa knieh ban phah nongïalehkai sha katei ka NE Games.
“Ha kane ka jingïakynduh, ka NESA ka la lah ban ïasyllok bad ki bor sorkar bad ki bor kynhun ïalehkai bapher bapher ban wanrah ka jingïabeit ha kaba la phah ïa ka kyrteng jong ki nongïalehkai na ka jylla Tripura.