Shillong, Lber 12 : Ka National People’s Party (NPP) Umroi Block hynne ka sngi ka la pynkup burom ïa i samla Boniffila Shullai, i thei ïalehkai phutbol ba mihkhmat ïa ka India ha ka lympung U-16 jong ka South Asian Football Federation kaba dang shu lah shen ha Kathamandu, Nepal.
Itei i samla i la poi hynne ka janmiet sngi Ba – ar hadien ba i la wanphai na Nepal. Ïa ka samla Bonifilia la pdiang burom da u Bah PR Rynghang General Secretary ka NPYF State Unit ryngkat ki nongïalam ka NPP Umroi.
Kumban shu kdew hangne, katei ka samla na ka jylla ka la ïoh ban donlang bad ka kynhun ïalehkai ka India ha ka thup ba nyngkong (First XI) ha ka jingïakhun final jong ka SAFF U16 Women’s Championship 2024 ba khatduh pyrshah ïa ka Bangladesh kaba la kut noh da ka jingshah rem lyngba ka jingshut penalty da 3-2 kol ha kane ka sngi U Blei.
Ha ka jingïalehkai ka India ka la ïalehkai bha naduh ba sdang da kaba ïoh ban pynkhih jar tang ha ka minit kaba saw lyngba ka Anushka Kumari na ka bol kaba la pashat kham najngai da ka Bonifilia.
Tangba ka jingkyrmen jong ka kynhun ka la pjah noh hadien ba ka thei ïalehkai ka ri, ka Shweta Rani ka la kum thep noh sha kol la jong ha ka minit kaba 70 jnog ka kylla miet kaba la pynlong ïa ka rai rem rai jop ban poi sha ka tie-breaker.
Ka ‘thei apkol ka Bangladesh ka Yearzan Begum ka la lah ban pynpaw ïa ka jingtbit ha kaba ka la lah ban pyllait na ka jingshah thep haduh lai sien ha ka tie-breaker bad kaba la lah ban pynurlong na ka bynta ban rah syndon ïa ka nam lahduh.
