Jowai, Nailur 19: Ka lehñiam ‘Behdeiñkhlam Behkymphui’ jong ka Seiñ Raij Mynso West Jaiñtia kaba ju long shisien shisnem la pynkut noh ïaka mynta ka sngi 19 tarik ïa kane ka lehñiam la sdang naduh ka 16 tarik u Nailur 2023.
Ha kane ka sngi pynkut jong ka jinglehñiam Behkymphui la wan sakhi lang da u kongsan Rgh. Kamnipaia Challam na ka Sein Raij Jowai, ïa ka jingïalang ba lyngkot la pynlong ha Yung Langdoh ka Raij Mynsoa ba la pynïaid da u Habijan War u President ka Seiñraij Mynso, la ïoh ka ka jingainguh na u K. Situng, katba ki kyntien pdiang burom na ka E. Sungoh.
La pyntip ba ïa kane ka lehñiam la pynlong ïa ka hashaw ba ki khun ki hajar jong Raij Mynsoo kin leit hiar sha ki hali ki pynthor ban ïoh ot ïa u kba u khaw uba miat bad ba bha.
Hadien bala pyndep ïa ka suit ka choor kila mih na Yung Langdoh ha ryngkat ki Kymphui da kaba sieh ïa ki ha shi lynter lynti nadooh na Khloo Blai shaduh ïaw ban pynkheiñ ïa ki siej kiba buh harud surok bad ka jingduwai ainguh hashwa ban hair ha pung um Ñiawwyrnai.
Nangne kila mih sha ka jaka ba ki khot ka Tre Madan Mari ban pyndep ïa ka Kñia Syiem Khlam Syiem Dait da kaba kñia da kawei ka sniang.
Ha ka juh ka por ka jingpyndep ïa kane ka Behkymphui kaba dei kawei na ki bynta jong ka jinglehñiam ka Seiñ Raij Mynso kan beh shajngai ïa ka pang ka shitom, kan wanrah ïa ka bah ka miat bad ka roi ka par ha baroh ki liang.
