Pyndam noh ka High Court ïa ka mukotduma POCSO hadien ba ki arngut ki la ïathoh bad ïohkhun uwei

Shillong, Iaiong 19 : Haba pyndam noh ïa ka mukotduma POCSO jong ki arngut ki shijur kiba la dep ïathoh shongkurim bad ioh uwei u khun shynrang, ka ïing Bishar High Court ba don burom jong ka jylla ka pynpaw ba ka jingpyndam noh ïa kane ka mukotduma ka long hadien ba la lap ba kine ki shijur ki ïa hap samla da ka jingïamynjur lang bad kumta kum ïa kane ka jingjia hap ban da bishar bniah bha ban ïoh sha ka jingbishar ba hok.
ïa kane ka hukum la pynmih da ka Bench kaba la khlieh da ka Chief Justice ka Revati Mohite Dere ha ka Sngi Thohdieng halor ka jingkyrpad ba la ïoh pdiang na u Pyndaplang Jalong uba kyrpad ban pyndam ne pynwai noh ïa kane ka mukotduma kaba la rejister case ha Mawlai Police Station.
La kyrpad ban pyndam ne pynwai noh ïa kane ka mukotduma namar une uba shah kynnoh bad kyrpad ban pynwai noh ïa ka mukotduma bad kane ka samla ki la ïathoh shongkurim bad ki la ïoh ïa uwei u khun na kane ka jingïahap samla jongki.
Kat kum kane ka longkmie ka la ïathuh ba ka jingïahap samla jongki ka dei da ka jingïaieit namar ki la ïaid samla naduh u bnai Risaw 2021 bad kane ka jingïahap ka dei da ka jingïamynjur lang. Hadien kane ka la pun khun bad ka hap ban ai da ka Ejahar namar une u samla uba ka ieit thep mynsiem u la ai jingmut ba kan pynhap noh ïa i khun bad ka pat kam treh satia.
Kumta ban pynthikna ba la ka dei shisha da ka jingïamynjur lang, ka ïing bishar ka la bthah ïa ka ban leit mih hakhmat Secretary High Court Legal Services Committee.
Ka kaiphod ba 10 tarik Iaiong 2026 ka ïathuh ba ka dei kaba la san bad ki ïasah lang ha kajuh ka ïing naduh ka kmie, ka kmie ieit bad ka meisan jongka lem ma ka u kurim bad u khun.
Ka paw ruh ba kane ka longkmie bad uba shah kynnoh ne u kurim jongka ki la dep ïathoh bad bam smai ha ïing Mane ha u 2025 bad ha katei ka jingïathoh la ïadon lang na baroh arliang ïing arliang kur.
Ka paw shuh shuh ba ka jingmynjur ba ka la ai ka dei kaba da ka jingtip briew tip Blei na ka bynta ban pyndam noh ia kane ka mukotduma pyrshah ïa u kurim jongka uba ka la dep ïathoh shongkurimbad ka. Ka ïing Bishar ka pynpaw ruh ba ka jingshisha hi ha Meghalaya ym lah ban len ba ka jingïahap samla khynnah da ka jingïamynjur lang ka jur bha bad ka jingïashongkha khynnah bad ïa im kum shitnga ruh ka jur bha ïa kaba la pdiang ruh ha ka imlang ka sahlang.
Kumta ban pyndam noh ïa kane ka mukotduma kat kum ka kyndon 528 BNSS kaba dei da ka jingïamynjur lang ka long kaba lah ban pdiang . Tangba hap ban da bishar bniah bha ha kum kine ki mukotduma ban ïoh ka jingbishar hok.
“ Namar une u samla shynrang bad kane ka samla kynthei ki la dep ïathoh bad ïa im kum shitnga bad don ruh uwei u khun kumta ban phah ïa une u kurim sha phatok ruh kan ym dei ka jingbishar ba hok namar kan wanrah ka jingsngewsih ïa ka kynthei kaba la don la u khun uba ki la kha da ka jingïamynjur bad jingïaieit lang.
Kumta hadien ba la bishar nadong shadong ka ïing bishar ka la pyndam noh ïa ka Ejahar ne ka FIR. Ka ïing Bishar ka la hukum ruh ba kane ka longkmie bad u khun ki dei ban ïoh lut baroh ki skhim sorkar jylla bad sorkar pdeng kynthup ïa ka skhim Care and Support kat kum ka kyndon 4 bad 6 jongka POCSO Act, Mission Vatsalya, Beti Bachao Beti Padhao, Meghalaya Victim Compensation Scheme 2022, Ayushman Bharat PM-JAY bad ban ai jinghikai pyntbit ïa kane ka longkmie lada ka kwah.
La bthah ia District Child Protetion Officer (DCPO) bad Secretary DLSA East Khasi Hills District ban pynthikna ba kane ka longkmie kan ïoh ïa baroh kitei ki skhim kynthup ïa u khun rit la kumno kumno ruh hapoh 8 taiew naduh ka sngi ba pynmih ïa kane ka hukum. La bthah ruh ban ai kaiphod sha ka ïing bishar halor kane ha ka 19 tarik Jylliew 2026.