Pynbna u Archbishop Victor Lyngdoh ïa u 2027 kum u Snem ki Samla ha ka Prosesshon Ïukharist

Shillong, Naiwieng 08: U Lyngdoh Sad ka Jyllaniambah ka Shillong, u Most Rev Victor Lyngdoh, ha ka Sngi U Blei u la pynbna ba u snem 2027 un long u Snem kyrpang jong ki Samla ha ka Jylla Niam Bah Shillong. U la pynbna ïa kane ha ka jingrakhe Prosesshon Ïukharist Bakhuid ha Cathedral Mary Help of Christian ha Laitumkhrah, kaba la long ruh ka jingpynkut ïa u Snem ki Riewngeit 2026 ba la buh da ka Jylla Niam Bah Shillong.
Ha ka jingkren sha ki paid riewngeit, u Archbishop Lyngdoh u la phai kyrpang sha ki samla. U la ong ba ka Balang ka ieid ïa ki bad ka don ka jingkyrmen kaba khraw ha ki. U la kyntu ïa ki ban mih shakhmat haba ka Balang ka donkam ïa ki, ban ïada ïa ka Balang bad ban long kiba shlur ha ka jingim jong ka jingngeit.
U la pynkynmaw ïa ki samla ba U Khrist u long uba jop, bad u la kyntu ïa ki ban pynskhem ïa la ka jingngeit, ban long kiba duwai bad ban ïaleh ban jop ïa ki jingtynjuh jong ka pyrthei. U la kyntu ruh ïa ki ban long kiba stad ha ka rukom pyndonkam ïa ki rynsan media, ban sumar ïa ka jingim ba kynja mynsiem bad ban long kiba jai jai haba ki ïakynduh ïa ki jingeh.
Ka Shnat Niam Maria Nongïarap ki Khristan, Laitumkhrah, ka la pynlong ïa ka prosesshon halor ka phang “Da ka bor jong ka Ïukharist, la khot ïa ngi ban long ka mluh bad ka jingshai jong ka pyrthei.” U Kardinal Filipe Neri Ferrão, u Lyngdoh Sohblei Rangbah ka Goa bad Daman bad Patriarch of East Indies, President ka Conference of Catholic Bishops of India (CCBI) u la ïalam ïa ka prosesshon da kaba rah ïa ka Sakrament Ïukharist Bakhuid Tam ha ka kali ba la pynriam kyrpang.
Ki paid riewngeit ki la ïaid lang ha ka prosesshon, da kaba duwai bad rwai katba ka jingïaid ka la ïaid lyngba ka thaiñ Laitumkhrah, Dhankheti bad Madan Ïewrynghep shaduh Kalbari. Ka Cathedral Band, ka Don Bosco Band bad ka Savio Junioriate Band ki la tem ïa ki sur jingrwai ha ka lynti. Ka kynhun na ka Shnat Niam Laitkor ka la shim bynta ha ka riam tynrai bad ka la tem ïa ka ksing.
Ha Kalbari, la pynkut ïa ka prosesshon da ka jingmane ïa ka Sakrament Bakhuid Tam ka Duwan, ryngkat ki jingduwai bad ki jingrwai. Ka Carmel Attard Choir na ka Shnat Niam Marbisu ka la ïalam ïa ki paid riewngeit ha ki jingrwai ha ka por jong ka jingmane.