Pynbna kyndon jingmana ka DS Chilliangraij Jowai halor ki kam ïalap Election hapoh shnong

Jowai, K’Lyngkot 20: Ka Dorbar Shnong Chilliangraij Jowai kala pynbna paidbah ïa ki kyndon jingmana kaba ïadei bad ki prokram ïalap election hapoh u pud u sam jong ka shnong na ka bynta ban ïaid beit ïaid ryntih jong ka Election MLA 2023 ka ban sa long shen.
Ka shnong kaba pynmih ïa kine ki kyndon kiba long kumne: la kyrpad ïa ki nongpynlong jingïalang Election hapoh ka ïing Dorbar jong ka shnong ba kin pynkut ïa kano kano ka jingïalang jong ki hapoh ka 10 waje mynmiet.
Na ka liang u kyrtong (Candidate) u lah ban ïalam tang hapoh 8 ngut ki nongbud kiba dei nabar ka shnong Chilliangraij bad yn shah tang 2 tylli ki kali kaba kynthup lang jong u kyrtong ba kin rung sha ka jaka ba pynlong jingïalang, khnang ba kane kan ïarap na ka jingsahkut kali ha ki lynti ki syngkieng jong ka shnong.
Ki nongwan sngap sha ka jingïalang paidbah kin long beit tang na ka bynta ki trai shnong, kynthup lang ïa kitei ki phra ngut kiba wan lang bad u kyrtong.
La pynbeit ba yn shah tang lai ngut ki nongkren ha ka jingïalang kynthup lang ïa u kyrtong bad tang uwei u nongkren na ka liang ki nongshong shnong uba dei ruh u/ka nongkyrshan ïa u kyrtong bad um dei satia napdeng ki nongkitkam shnong.
Na ka bynta ki kali jong ki nongkyrshan kim bit satia ban pynsawa ïa ki sur jingrwai hapoh ki kali, ha ka por ba pynlong ïa ki jingïalang paidbah hapoh ka shnong.
Ka shnong kala khang pyrshah ïa kino kino ki kali ban ïaid ha ki por mynmiet bad kumjuh ïa ki nongsam pisa lada ka shnong ka lap, ki lah ban shah pynshitom katkum ki kyndon aiñ da kaba aiti sha ki bor ka aiñ.
La khang ban leh Decoration ïa ki rynsan ba pynlong jingïalang ha kino kino ki bynta jong ka shnong bad ka shnong kam shah ban sam sha ïa ki paidbah lait noh ïa kitei ki phra ngut ba wan lang bad u kyrtong namar kane kan ïarap ha ka liang ka khuid ka suba.
Na ka bynta ki kyrtong kiba thmu ban pynlong jingïalang hapoh ka shnong ki dei ban bud ryntih ïa kine ki kyndon aiñ bad ki dei ban ïoh bor shwa na ka shnong, lada don kiba ïaid lait ki lah ban shah pynsangeh shi shyndon ïa ka jingïalang jong ki ha kano kano ka por.
Ka shnong kala pyntip paidbah ba ïa kine ki kyndon yn pyntrei kam salonsar ïa baroh khlem da ñiew shilliang, ha ka juh ka por la kyrpad ïa baroh ban ïatreilang bad kane ka jingpynbeit jong ka shnong khang ba kane ka Election MLA 2023 kan long kaba ïaidbeit ïaid ryntih. Kane ka long katkum ka jingpyntip na ka ophis jong u Waheh Shnong bad u General Secretary ka Dorbar Chnong Chilliangraij Jowai.