Hiar u Bah Ardent Basaiawmoit sha Ri Bhoi ban ïalap election na ka bynta u kyrtong ka VPP ha Umsning

By Mawphor News Desk On Jan 21, 2023

Nongpoh, Kyllalyngkot 20: U President ba rangbah ka Voice Of People’s Party (VPP), u Bah Ardent Miller Basaiawmoit mynta ka sngi u la hiar sha Ri Bhoi kum u nongïalam ba rangbah katei ka party na ka bynta ban ïalap election bad kumjuh ruh ban pan ka jingkyrshan na ka bynta u kyrtong ka VPP Na Umsning Constituency, u Dr. Ricky A.J Syngkon, u ban aireng na katei ka party na Umsning Constituency.
U Bah Ardent Miller Basaiawmoit u la wan ruh ban ai jingkren ha ka jingïalang ka VPP Party kaba la long mynta ka sngi ha Iewmawlong, Nongpoh ha ryngkat ka jingdon lang u kyrtong ka VPP na Umsning, u Dr. Ricky A.J Syngkon , ki nongïalam ka Party bad ki riew paidbah kiba la sngap ïa ka jingïalap election jong utei u Nongïalam kaba dei ruh ka sngi Iew Nongpoh ha ka Shnong Iewmawlong.
Na ka liang u Bah Ardent Miller Basaiawmoit haba kren bad pan jingkyrshan na ki paidbah ka Umsning Constituency ban ai jingkyrshan ïa u kyrtong, u la kren halor shibun ki mat treikam bad ki nongrim ka party VPP na ka bynta ka election 2023 hapoh ka jylla.
Ka phang pdeng kaba u la kren ban pan jingkyrshan na ki paidbah ka dei ka jingkular ban rat diengkhong ïa ka kam bamsap hapoh ka jylla bad ruh ka party VPP kan phai khmat kyrpang sha ki nongrep jong ka jylla.
Na ka liang u Bah Ardent Miller Basaiawmoit haba kren ha kane ka jingïalang u la kynthoh ruh ïa ki party riewlum da kaba ong ba ki party riewlum ki dei tang ki rongser kiba don ha ka sorkar ban ioh jingmyntoi shimet bad ki klet ïa ka nongrim ban ïarap na ka bynta ka eh ka shon ki paidbah hapoh ka jylla bad ki shah ïalam bakla ha kiwei ki party ba ioh bat ïa u lakam ka jingsynshar ha kaba ki baduk ba kyrduh bad ki nongrep ki dang shah khniot bein hapoh ka jylla.
U la kyntoh ruh da kaba ong ba ka daw jong ka jinghiar arsut ka jylla ka dei ka jingjubor palat ka kam bam sap hapoh ka jylla bad ha ka jaka ba jylla kan dang kiew shaphrang ka la hiar arsut na ka daw ki kam bam sap hapoh ka jylla.
Shuh shuh, haba pan jingkyrshan na ki paidbah ban pynjop ïa ka party VPP, na ka liang u Bah Ardent Miller Basaiawmoit u la kular ba lada ki paidbah ki kloi ban pynjop ïa ka party VPP ka party VPP kan sei lut ïa baroh ki kam bamsap jong kane ka sorkar kaba mynta kaba la ktah shisha ïa ki paidbah hapoh ka jylla, u la bynrap.
Na ka liang u kyrtong ka VPP na Umsning Constituency, u Dr.Ricky A.J Syngkon haba kren ha kane ka sngi u la pan ïaka jing kyrshan na ki paidbah ka Umsning constituency ban ailad ïa u ban jop ha kane ka election 2023 bad ïa ka party VPP da kaba kyntait ïa kiwei ki party kiba la ioh bat ïa ka u lakam ka jingsynshar bad dei tang lada wan ki party ba thymmai ki lah ban ïalam thymmai ka ka jylla na ka bynta ka jingkiew shaphrang jong ka jylla ha baroh ki liang.