La pyntreikam pura ïa ka Model Code of Conduct bad pynjari ïa ki kyndon 144CrPC hapoh East Jaiñtia Hills District

Khliehriat Kyllalyngkot 20: U District Magistrate jong ka East Jaiñtia Hills District, u Abhilash Banarwal, IAS ha ka hukum ba la pyllait myn ha ka 18 tarik mynta u bnai, u pynbna paidbah ba la pyntreikam pura ïa ka Model Code of Conduct hapoh ka district bad kane ka hukum kan treikam noh mardor tat haduh ban da pynbna da kumwei pat ka ban long na ka bynta ka jingïaid beit ïaid ryntih ka election ka ban wan hapoh ka jylla.
Hapoh kane ka Model Code of Conduct la mana ruh ban thied ïa ki nongthep vote bad ki nongthep vote ki dei ban don la jinglaitluid ban pyntreikam ïala ka jong ka hok ban thep vote khlem kano kano ka jingsngew tieng ne kano kano ka jingsngew artatien.
La ong ruh ba ki bor synshar district ki la ïoh jingtip ba ki don katto katne ki briew kiba ju rah shibun ka pisa pliah bad pyrshang ban thied ïa ki nongthep vote bad bthah ba kin thep ha u kyrtong uba ki kyrshan, kumta la mana bad khang pyrshah ban leh ïa kane.Kumjuh ruh ki don ki kynhun (organisations) kiba thaw ïa ki prokram ïakhih kum ki jingïaid procession bad ki rally bad kino kino ki prokram ha kum kane ka por ïa kum kine ruh la khang pyrshah bad ong ruh ba lada shah bad ailad ïa kum kine kam ktah ïa ka election ka ban sa pynlong bad lehse ka lah ban wanrah ïa ka jingïania, ka jingïashoh ïadat bad ka lah ban ktah ïa ka shongsuk shongsaiñ hapoh ka district bad lehse kan wanrah ruh ïa ka jingduh ki mynsiem briew bad ka duh, jingjoulor ki tiar, ki mar ki mata jong ki briew shimet, kumta ban dup lait na kine kiei kiei, u District Magistrate u pynbna ba la pyntreikam pura ïa ki kyndon aiñ jong ka 144 CrPC.
Hapoh katei ka kyndon 144CrPC ha ka district la mana pyrshah ruh ban rah ïa ka pisa kaba T50,000 tyngka shaneng, la mana ruh ïa kino kino ki kynhun ban pynlong jingïalang lane kino kino ki prokram ïakhih hapoh ka district bad kane ka hukum kan treikam noh mardor.