Shillong, Naiwieng 17: Ka Meghalaya Cricket Association ka la dep ban rai a bynta ki 15-ngut ki dkhot kynthup bad san ngut ki player standby ki ban mihkhmat ïa ka jylla sha ka lympung ïakhun jong ka Vijay Hazare Trophy, kaba dei kawei na ki lympung hapdeng ki jylla jong ka BCCI na bynta ki shynrang, bad ka kynhun ka kynthup ruh ïa u wei u rangïalehkai kriket professional.
U Tanmay Mishra u dei u rangïalehkai ba la kha ha Mumbai u ba la don bynta ruh bad ka kynhun Royal Challengers Bangalore bad ruh ka kynhun Deccan Chargers kiba ïakhun ha ka lympung Indian Premier League bad u la mih madan ruh na ka jylla Tripura. Shuh shuh, u la mih madan ruh na ka kynhun lehkai bar ri Kenya, ka ri kaba u la heh la san.
Ka jingshah kynthup ka jong hapoh ka kynhun kan dang pynkhlaiñ shuh shuh ïa ka Meghalaya khamtam ha ka batting ban sa ïakhun ha kane ka lympung. Ka Meghalaya Cricket Association ka la ïoh biang ban wanrah biang ïa ki ar ngut ki rangïalehkai professional kiba la ju mih madan teng na ka kynhun – kiba kynthup ïa u Rajesh Bishnoi bad u Nakul Verma.
Baroh hynñiew tylli ki jingïakhun jong ka Meghalaya kin sa long ha Jaipur. Bad ka kynhun ka la shah kynthuplang bad ka Vidarbha, Chhattisgarh, Jharkhand, Maharashtra, Services, Manipur bad ka Hyderabad, Te ka Meghalaya kan hap ban aireng pyrshah ïa kine ki kynhun ba khlaiñbor ha rynsan ïalehkai cricket jong ka ri.
Kane ka kynhun ka don jingïapher baklybak bad ka kynhun Meghalaya kaba shimbynta ha ka lympung Syed Mushtaq Ali Trophy T20 dang shen. Kiba dang shah kynthup ha ka kynhun ki long u Kishan Lyngdoh bad u Dippu Ch Sangma bad ruh u Jaskirat Singh Sachdeva, u bym pat shym la ïoh ban sdang mih madan mynno mynno ruh ha ka BCCI senior level tournament.
Ki player kiba la shah jied ryngkat bad ki nongkitkam (official), lait noh ki rangïalehkai standby, kin mih napoh jylla ban leit shapoh Jaipur ha ka 20 tarik Naiwieng.
Ka kynhun ki rangïalehkai ka Meghalaya: Akash Kumar Choudhary, Anish Charak, Bamanbha Shangpliang, Dippu Ch Sangma, Jaskirat Singh Sachdeva, Kishan Lyngdoh, Lerry G Sangma, Lakhan Singh, Md Nafees Siddique, Raj Biswa, Sanvert Kurkalang, Swarajeet Das, Nakul Verma, Rajesh Bishnoi, Tanmay Mishra Standbys: Yogesh Tiwari, Wilco Marak, Robert Sangma, Arbin Singh, Rounak Nongrum
Support staff: Goutam Shome (head coach), Moisten Ch Marak (assistant coach), Surojit Biswas (physio), Vikash Singh Chauhan (trainer), OL Warjri (manager)
Ka prokram jingïakhun jong ka Meghalaya:
vs Vidarbha, 23 Naiwieng
vs Chhattisgarh, 25 Naiwieng
vs Jharkhand, 27 Naiwieng
vs Maharashtra, 29 Naiwieng
vs Services, 1 Nohprah
vs Manipur, 3 Nohprah
vs Hyderabad, 5 Nohprah
