Shillong, Naiwieng 17: Ka jingïai bteng hap slap hynne ka Sngi Thohdieng ka la pynthut ïa ka jingïalehkai kaba la khreh na bynta ka Meghalaya bad Mizoram ha ka lympung lehkai jong ka Cooch Behar Trophy, kaba dei kawei na ki lympung ki samla ba dang hapoh 19 snem, kaba la khreh ban ïakhun ha MCA Ground, Polo, hynne ka sngi hynrei la hap ban pynsangeh noh.
Kane ka dei ruh ka sien kaba nyngkong ba ka jingïalehkai jong ka BCCI domestic tournament ban ïoh pynlong hapoh ka jylla na bynta ka samoi 2023-24.
Watla u slap um da jur, hynrei ka jingïai bteng ban hap slap, kam shym la ailad ïa madan ban rkhiang bad la hap ban tap ïa ka naduh ka por mynstep tad haduh ba u umpire ba dei pynïaid ïa ka jingsakhun un pynbna ïa ka rai ha ka por 2 baje nohphai sngi ban weng shuwa ïa ka jingïakhun bad yn sa pyndep ha ka sngi ban wan.
Ki dang don sa lai sngi ba dang sah na bynta ka jingïalehkai, la khmihlynti ba ka mariang kan ailad. Ka jingïalehkai kan bteng biang mynta ka sngi ha ka por 8:30 baje mynstep lada ailad ka bneng.
