Shillong, Risaw, 09: Ki Pulit ka kynhun Anti Narcotic Task Force (ANTF) East Khasi Hills kiba la ïoh ïa ka jingtip kaba bniah na ki tnat syntiat da ka jingïatreilang bad ki Pulit jong ka Mawlai Police Station ha ka sngi Balang ki la ïoh pynsangeh hajan ka Banalari Showroom, Mawlai ïa kawei ka kali Tata Sumo kaba wan na Guwahati ban rung sha nongbah Shillong.
Na kane ka kali, ki Pulit ki la ïohbat ïa u Abdul Mukit, 43 snem ka rta uba shong basah ha ka shnong Siverchak, Kamramganj, Assam bad ïa u Sawrupananda Mohanta, 38 snem ka rta uba sah ha ka shnong Mohanpur, P.t-II, Cachar, Assam.
U kyrwoh ba la phah da u Superintendent of Police jong ka East Khasi Hills District u Bah S. Nongtnger u la pyntip ba na kine ki arngut, ki Pulit ki la ïoh ban kurup san tylli ki synduk thep sabon ba la thep ïa u drok uba khia 57.51 gram, saw tylli ki mobile phone, kawei ka EPIC Card, kawei ka PAN Card, ar tylli ki ATM Card bad kawei ka Driving Licence.
Ha kaba ïadei bad kane, ki Pulit ki la register case ha Mawlai Police Station bad ka jingtohit ïa kine ki arngut ka dang ïaid shakhkmat.
