Pyllait u Myntri Rangbah bad Myntri kam jngohkai ïa ka jingñiah thung thuk ki CRPF kynthei sha kylleng ka ri

By Mawphor Editor On Oct 6, 2023

Shillong, Risaw 5 : U Myntri Rangbah jong ka jylla Meghalaya ryngkat bad u Myntri ka tnad kam jngohkai u bah Paul Lyngdoh mynta ka sngi ki la kaweh lama kum ka dak ban pyllait ïa ka jingñiah thuk thuk sha kylleng ka ri da ka Yashaswini, ka kynhun nongñiah thuk thuk ki kynthei kiba dei ki dkhot ka CRPF Shillong. Ka CRPF ha ka jingïatreilang bad ka Tnat Women and Child Development ka la pynlong ïa kane ka jingñiah thuk thuk ban rakhe ïa ka Nari Shakti (kajingpynkup bor ïa ki longkmie) ha ka ri.
Haba ai jingïaroh ïa ka jingshlur kaba khraw, ka jingkut jingmut bad ka jingshlur ba la pyni da ki longkmie jong ki kynhun shipai bapher bapher, u Conrad Sangma u la ong ba ki longkmie kim duna ïano ïano bad ba kane ka prokram bad ka jingniah thuk thuk ka dei kawei ka nuksa jong ka Nari Shakti. Haba pynpaw ka jingkmen jong u ban ïa don bynta ha kane ka prokram kaba kongsan, u Myntri Rangbah u la ong, “Na ki bynta bapher bapher jong ka ri, ki longkmie nongñiah thuk thuk jong ka CRPF kin sdang ïa ka jingïaid lynti jong ki bad kin ïakynduh lang ha u statue of unity bad kumta ka long ka burom kaba khraw ïa nga bad ka jingsngew sarong ban ïa don bynta bad kane ka prokram kaba kyrpang bad sa shisien nga ai khublei ïa ka CRPF na ka bynta kane ka prokram kaba ki la pynlong.”
U Myntri Rangbah u la ong ba u ju ngeit ba ka roi ka par ba shisha ka lah ban wan haba “Ngi lah ban ktah ïa man ka jingim, haba ngi lah ban kyntiew bad rah shakhmat ïa man u briew, haba ngi lah ban wanrah ka jingryntih hapdeng ki kynthei bad shynrang bad hapdeng ki
jaidbynriew.”
Haba kren shaphang ka thong jong u Myntri Rangbah duh ka ri ban pynlong ïa ka ri kaba la kiew bad kumno kum kine ki sienjam ki wanrah ka jingplie lad ban wanrah ïa ka jingïaryngkat kyrdan hapdeng ki nongshong shnong, u Sangma u la ong, “Ka ri kaba la kiew shisha, kaba u Myntri Rangbah duh jong ngi u la kren shaphang bad ba la buh thong ba hashuwa u 2047 ka India ka dei ban long ka ri kaba la kiew kane ka lah ban jia tang haba man ka jaidbynriew bad man u nongshong shnong bad man ka bynta bad u briew jong ka ri ba khraw jong ngi ki ïaid shaphrang. Bad kumta kaei kaba ngi ïohi mynta ka dei kawei ka nuksa jong kata ka sienjam ban pynthikna ba ka don ka jingryntih ha ka rukom treikam jong ngi.”
U Sangma u la ong ba ka jingñiah thuk thuk ka dei ka jingpyndon burom ïa ka Nari Shakti jong ngi, kaba long ka dustur kaba la rim bha jong ka deiriti jong ngi bad ka jingpyni ïa ka bor jong ki longkmie. “Ka Meghalaya bad ka deiriti jong ngi, ki briew bad ki jaid bynriew hangne ki la bat ïa kane da ki spah snem. Ka Meghalaya ka dei ka imlang sahlang kaba ai jaid sha ka kynthei bad na ka bynta ka jingtip jong ki nongñiah thuk thuk bad ki ophisar kiba wan na ki bynta bapher bapher jong ka ri kin dap da ka jingkmen ban tip ba ki jaidbynriew jong ka Meghalaya bad ki briew ki la trei na ka bynta ka Nari Shakri bad ka jingïaryngkat kyrdan da ki spah snem.”
U Sangma u la ong ba ki la don ki sienjam ban pynthikna ba ki longkmie ruh ki ïashim bynta ha ki kam ka ïoh ka kot ha ka jylla. U la ong ba ka Meghalaya ka long kawei na tang katto katne ki Jylla kiba la pyllait ïa ka resolution ban buh kyrpang 50% ki post Secretary bad President jong ki Village Employment Council na ka bynta ki longkmie. U Myntri Rangbah u la ong ruh ba ha kine ki san snem ba la dep, ka jingïashim bynta ki longkmie ha ki Self Help Group ka la kiew na ka 30,000 sha ka 4.5 lak. Kane ka pyni ïa ka jingkut jingmut ka Sorkar ban pynkup bor ïa ki longkmie ha ka jylla bad kane ka kyntiew ïa ka bynta jong ki ha ka ïoh ka kot.
U Myntri Rangbah u la pynpaw ka jingsngewnguh ruh ïa u Myntri Rangbah Duh halor ka jingmynjur ïa ka Women Reservation Bill bad u la ong ba ka jingïashim bynta jong ki longkmie ha baroh ki bynta jong ka jingim ka long kaba donkam bha na ka bynta ka jingpynkup bor ïa ki.
Kum shi bynta jong kane ka sienjam, lai kynhun jong ka Jingñiah Thuk Thuk da ki longkmie ka CRPF ki dei kiba la pyllait paidbah na Shillong, Srinagar bad Kanniyakumari bad kin ïa kynduh lang ha Ekta Nagar, Gujarat ha ka 31 tarik u Risaw, ha ka lyngkhuh sngi kha jong u Sardar Vallabhbhai Patel. Kane ka jingñiah thuk thuk kan ïaid lyngba 3291 km bad ha kane,
kine ki nongñiah thuk thuk kin ïaid lyngba hynniew tylli ki jylla shuwa ba kin ïakynduh lang ha Ekta Nagar.
Ha kane ka jingïaid lynti jong kane ka jingïatreilang hapdeng ka CRPF bad ka tnat Women and Child Development, kine ki lai tylli ki kynhun na Srinagar, Shillong bad Kanyakumari kin ïakren bad ki briew kiba ïadei bad ka kam Beti Bachao Beti Padhao (BBBP) kum ki khynnah skul bad ki samla kynthei kiba leit kolej, ki SHG jong ki longkmie, ki cadet jong ka NCC, ki khyn jong ki CCI, ki dkhot NYKS, ki samla shynrang bad kynthei, ki nongtrei anganwadi ha ki distrik bapher bapher. Ka jingthmu ka dei ban pynkhlaiñ shuh shuh ia ka prokram Beti Bachao Beti Padhao jong ka tnat Women and Child Development.
Ha ryngkat ka jingkyntiew ïa ka khubor Desh Ke Hum Hain Rakshak jong kane ka kynhun, kine ki longkmie ba ñiah thuk thuk ki wanrah ruh ïa ka khubor jong ka Beti Bachao Beti Padhao ha kane ka jingïaid lynti jong ki. Kin pyni ïa ka logo BBBP ha ki jaiñ bad ki banner jong ki kum ka dak jong ka jingkyrshan jong ki ïa kane.
Ka kynhun ki longkmie ba tem jazz jong ka CRPF Jazz, Stoney Haven, ka la pynshongshit ïa kiba wan ïashim bynta ha kane ka sngi. Kumba ong ka CRPF, ka Stoney Haven kam dei tang ka jingpyni ïa ka sap ha ka put ka tem hynrei ka dei ruh ka jingrakhe ïa ka bor bad ka jingskhem jingmut jong ki longkmie.
U Bah Paul Lyngdoh, Myntri ka tnat Social Welfare, Sorkar Meghalaya, u Anurag Agrawal, IG, NE Sector, CRPF, ki heh pulit, Defence bad ki bor pynïaid ïa ka jylla ki la ïashim bynta lang ha kane ka prokram.