Shillong, Risaw 05 : Baroh ki Deputy Commissioner bad ki Sub Divisional Officer (Civil) na kylleng ka jylla ki la kynduh lang ha kane ka sngi Palei ha nongbah Shillong ban ia kren bad iatai halor ki jingeh ba bun ba ki kynduh ha ka jingtreikam bad ruh kumno ban pynjanai ia ka jingshakri ia ka jylla nangne shakhmat.
Ha katei ka jingiakynduh kaba shisngi, kitei ki heh sorkar ki la ioh ruh ban iatai halor kiba bun ki phang la ka long naduh ka synshar khadar, ka jingtrei ia ki kam pynroi, ka jingshakri ia ki paidbah nongshong shnong bad khamtam eh ban wanrah ka jingiatrei lang kaba jan hapdeng ki tnad sorkar bapher bapher.
U Myntri Rangbah ka jylla, Conrad K Sangma u la wan ban donlang ha katei ka prokram kum u Kongsan ban ai ka jingkyntu kynpham ia ki ophisar kiba wan na kylleng ki distrik bad ki department da kaba banjur ban kyntiew ia ka Meghalaya na kaba bha ba ka long mynta sha ka Meghalaya kaba kham janai hadien.
“Ngi donkam ban bteng ia ka kam ba bha ba ngi trei bad khamtam eh, ban buddien ia ki jingtreikam naduh ki shnong ki thaw. Ka jingwan ka technology ruh kadei shi bynta kaba kongsan tam bad nga khmih lynti ba ka thong kaba ngi don na ka bynta ka CM Connect, Village Data Volunteer, DC Connect bad ka Family ID Programme kan seisoh shen. Kumta haba ngi jam mynta shakhmat, ngi kwah ban kyntu ia phi ban long kiba la pynkhreh lypa na bynta kino kino ki jingeh kiba lah ban mih.
Ngi dei ban pynap lypa ba ngin ym ieh shiteng lynti haba pyntreikam ia kino kino ki jingthmu bad ban pyntikna ba kan don ka jingiatrei lang ban pynlong ia ka Meghalaya ban kot sha kata ka thong $10 billion Economy”, u la bynrap shuh shuh.
Ha kajuh ka por u Myntri Rangbah u la pynkynmaw bad banjur ruh ia ki ophisar ban phaikhmat sha ki skim ba kongsan ha ka jylla kum ka Jal Jeevan Mission, PMAY, CM Solar Mission, ka jingpyniasoh ha ki shnong ki thaw bad kyntu ia ki Deputy Commissioner bad ki Sub Divisional Officer ban buddien bha ia kitei ki projek.
