Nongstoiñ, Risaw 5: Ka surok ka dei ka mat kaba hakhmat duh kaba ki paidbah nongkyndong ki angnud haduh katta katta ba ka sorkar ka dei ban pynïoh. Ka jingdon jong ki surok ka dei ruh ka lad ban kyntiew ïa ka kamai kajih, ka ïoh ka kot bad ka pynsuk ïa ka leit ka wan jong ki paidbah ha ka por ba ki don kam.
Haba phai ha West Khasi Hills dang don shibun ki jaka kiba ki surok kiba pynïasoh ïa kawei ka shnong sha kawei pat ki dang duna haduh katta katta. Ka Rambrai Jyrngam Constituency ka dei kawei na ki Constituency kiba dang donkam haduh katta katta ïa ki surok, namar ka dei ka Constituency kaba baroh shilynter ka ïakhap bad ka Assam.
Ki paidbah jong katei ka Constituency haba ki leit donkam ïa ki nongmihkhmat kum ha Rambrai ki hap ban ïaid lyngba ïa ka Mawshynrut Constituency bad ka Nongstoiñ Constituency haduh ban da poi sha Rambrai. Na ka bynta ban wanrah ïa ka jingsngew jan hapdeng ki paidbah jong ka Constituency bad ki nongmihkhmat, ka surok na Rambrai shaduh Nonglang ka dei kaba ka sorkar ka la dei ban leh ei ei na ka bynta ban pynïoh noh kham kloi ïa ka surok na Rambrai sha Nonglang lyngba ka shnong Mawrok Thiepkseh.
Lah ban pynkynmaw ba na Rambrai haduh Mawrok ka la don ka surok kaba la shna lyngba ka Pradhan Mantri Gramsadak Yojana bad na Mawrok haduh Nonglang, lada tih ïa ka surok ka jingjngai ka long tang kumba phra haduh shiphew kilomitar.
Lada la pyntrei ïa katei ka surok, kan long ka jingkyrkhu kaba khraw ïa ki paidbah namar na Rambrai sha Nongstoiñ ka jingjngai ka long 20 kilomitar na Nongstoiñ haduh Nonglang ka long 36 kilomitar bad lada kheiñ lang ka long sanphew hynriew kilomitar, hynrei na Rambrai sha Nonglang ka jingjngai ka long tang kumba 18 kilomitar.
Ha ki lynter lum Mawrok ki don ki jaka kiba itynnad haduh katta katta kiba lah ban khring ïa shibun ki nong jngohkai lada don ki surok kiba biang. Nangta ka don ka wah Umit kaba don kawei ka kshaid Patharsynke kaba itynnad bad kaba jrong bha bad lada don surok kin don shibun kiba kwah ban leit sha katei ka kshaid.
Kumta, halor kine ki jingdonkam bad ki lad ki lynti na ka liang ki paidbah ki kyntu na u Bah R.G Momin MLA ba thymmai jong ka thaiñ ban shimkhia bad leh ei ei noh halor kane. Ki la ong ruh ba baroh shikatta ki la ju ap khmih lynti na ki nongmihkhmat, hynrei ym don ba patiaw uwei ruh. Kumta mynta ka kynti ki kyrmen skhem ba u ne u MLA ba thymmai un pyni kam, kumba u la ju pynpaw ruh man ka por ba ka roi ka par ka dei ka mat ba hakhmat eh jong u.
