Pyllait paidbah u Myntri Rangbah ïa ka Climate Action and Adaptation goal ha Mendipathar

Shillong, Jymmang 26: U Myntri Rangbah ka Jylla u Conrad K Sangma ula pyllait paidbah ïa ki katto katne ki sienjam kiba ïadei bad ka Climate Action and Climate Adaptation goals ha Meghalaya ha ka jingïalang kaba la long ha Mendipathar ha North Garo Hills.
Ha kane ka sngu ula buh ruh ïa ki mawnongrim jong ki sienjam ki bapher bapher ha ka jingdonlang u Myntri ka tnad PHE u Marcuise Marak bad u Myntri ka tnad Social Welfare u Bah Paul Lyngdoh bad ki MLA kiba kynthup ïa u Marthon Sangma bad u Rupert Momin bad ula plie ruh ïa ki artylli ki Girl’s Hostel ha Mendipathar bad ka Tribal Hostel ha Resubelpara.
Na ka liang jong u, ula pyntip ba ka Climate Adaptive Community-Based Water Harvesting Project kaba la kyrshan da ka ADB, ka long ka projek kaba palat ïa ka T.500 klur ïa kaba yn pyntreikam ha kylleng ki district jong ka jylla Meghalaya ban kyntiew ha ka ban pynneh ïa ka jingdon ïa ka um ka wah.
Hadien kane u la plie ruh ïa ka “Megh Adapt Pay”, ka project kaba T. 47.19 klur bad kane ka projek ka dei shi bynta jong ka Climate Adaptive Community Based Water Harvesting Project ban thung ïa ki dieng, ban pynneh pynsah ïa ki khlaw kiba la don lypa, ki jaka rep kiba la don lypa kiba la pyntreikam da ka Soil & Water Conservation Department.
Myntri Rangbah ula pyntip ba lyngba kitei ki projek, ki shnong ki thaw bad ka sorkar kin ïatreilang ban ïarap ha ka ban ïada ïa ki khlaw, ban kyntiew ïa ka sawdong sawkun ha kaba ïadei bad ka koit ka khiah, ban pynneh ïa ki jaka kiba don ïa ki tyllong um bad ban pynïar ïa ka jingjyrngam ha kylleng jong ka jylla.
Ïa ka Girls’ Hostel ha Mendipathar College, la tei ha ka jinglut jingsep kaba kot T.3 klur ka ban pynïaid da ka Awe Self-Help Group (SHG), katba ïa ka Tribal Girls’ Hostel ha Resubelpara la tei ha ka jinglut kaba kot T.2.5 klur bad yn pynïaid da ka Ramke Memorial School.
“Ki Hostel kin ai ïa ka jingshngaiñ, jingïada bad kyrshan ïa ka rukom im jong ki kynthei khamtam eh ïa kito kiba wan na ki thaiñ nongkyndong bad kan ïarap ruh ha ka ban pynlah ïa ki ban bteng ïa ka jingpule khlem kino kino ki jingeh,” ïathuh u Myntri Rangbah.
U la pynpaw ruh ïa ka jingkmen halor ka jingkiew jong ka Percentage ha ka jingpass ïa ka eksamin SSLC bad u la pyntip ba ka Result jong ka Supplementary Exam ka la nang kyntiew ïa ka percentage jong ka jingpass sha ka 96 percent, kaba long kaba heh tam ha ka thaiñ shatei lam mihngi bad kaba bha tam hapoh ka ri.
Na ka liang jong u, ula ong ba bun ki la kren bakla bha shaphang jong ka “CM Impact” guidebook hynrei kylli pat na ki khynnah pule bad na ki kmie ki kpa. U la ong ba ha ki snem kiba la dep, bun ki la pyndonkam ïa ki Guidebook ha ka SSLC bad ha kiwei kiwei ki eksam bad ka CM Impact kadei ka jingtuklar ban kyrshan ïa ki khynnah pule ki bym don ïa ka lad ban ïoh ïa kitei ki Guidebook.
Na ka liang jong u, ula ong, “Nga dap shisha da ka jingsngewhun ba ki khynnah ki jong ngi ki la lah ban pass ïa ka eksamin SSLC. Ka Guidebook ka la ïarap bha ïa ki. Nga ai khublei ïa ki khynnah kiba la pass ha kane ka eksamin.”