Shillong, Jymmang 26: Palat 5678 na ki 7066 ki samla pule ki la pass ïa ka Secondary School Leaving Certificate (SSLC) Supplementary examination ha kaba ha kane ka kynti ka pass percentage ka la long 80.35 percent.
Ïa ka result la pynbna da ka Meghalaya Board of School Education (MBoSE) ha ka sngi Nyngkong.
Ka jingpynlong ïa ka eksam ka la long kaba ïaid beit da ka jingïatreilang jong ka tnat pule puthi, ki bor pynïaid distrik, ka tnat pulit, ki khlieh ki jaka pule bad khamtam ki nonghikai kiba la trei khlem shongthait ha baroh kawei ka rukom pynïaid kam. Ka jingjop ka jingpynlong ïa kane ka eksam ka dei ka jingnoh synniang lang jong baroh, ong u board controller of examination u Bah TR Laloo.
Ïa ka supplementary examination khatduh la pynlong ha ka snem 1993.
“Ka result jong ka SSLC examination 2025 baroh ar ka main bad supplementary ka la long kaba kongsan na kiwei ki snem naba ka la don ka jingkiew jong ka pass percentage. Ka daw jong kane ka dei ka jingpynleit jingmut jong ki samla pule bad ka jingpynmih ïa ka CM IMPACT Guide Book,” ong u Laloo.
“Ka main examination pass percentage ka la long 87.10 percent. Haba shim ïa ka average jong ka main bad supplementary examination ka pass percentage jong kane ka snem ha ka SSLC examination ka long 96.02%,” u la ong da kaba bynrap, “Naba ngi la kiew bha ha kane ka snem, to ngin ïa peit shakhmat sha ki snem ban wan da ka jingïatreilang ban pynlong ïa ka lawei ki samla pule kaba bha ha ka pule puthi.”
