Shillong, Naitung 27: U Jayant Chaudhary, Myntri Khynnah ba peit ïa ka Tnat Skill Development bad Entrepreneurship (MSDE) bad Myntri Khynnah ka Tnad Kam Pule Puthi jong ka Sorkar India u la pyllait paidbah ïa ka Skhim Model Skill Loan ba la pynkylla.
Kane ka dei ka jingthmu ban plié lad ïa ki jinghikai pyntbit, kiba kynthup ki jinghikai kiba kham halor kiba ju long kiba rem dor bha, hynrei mynta ki ban lait na ki jingteh ha kaba ïadei bad ka pisa. Kane kan pynkupbor ïa ki samla jong ka India ba kin long ki nongtrei kiba la pynkhreh na ka bynta ka lawei.
Ka skhim ka thmu ban plié lad ban suk ban ïoh ïa ki jinghikai pyntbit, namar bun ki samla kiba don sap ki shem jingeh ban ïoh ïa kine ki jinghikai namar ka jingbym lah kotbor ha kaba ïadei bad ka dor jong kine ki jinghikai kiba ai ïa ki sap na ka bynta ka lawei bad kumba donkam ha ki jaka trei.
Da kaba ithuh ïa ka bynta kaba khraw jong ki NBFC bad ki Micro Finance Institution ha kaba ïadei bad ka jingai ram na ka bynta ka jingpyntbit, ka MSDE hadien ka jingïoh jingbit na ka Tnat Kam Pla Tyngka ka la wanrah ïa ki jingpynkylla ha ki mat treikam jong ka skhim.
Mynta, ki NBFC, ki Micro Finance Institution bad ki bank kiba rit ki lah ban ai ram ïa kiba yn ai jingïada na ka jing bym lah siew biang haduh 75% ka pisa ba la ai ram. Shuh shuh, ïa u pud jong ka ram ba lah ban ai la kyntiew sha ka T. 7.50 lak haba ïanujor bad ka T 1.50 lak kumba ju long mynshuwa.
Ha ka prokram ban pyllait paidbah ïa kane ka skhim ba la pynlong ha Kaushal Bhawan, u Jayant Chaudhary, Myntri Khynnah (Independent Charge), ka Tnat Skill Development & Entrepreneurship (MSDE) bad Myntri Khynnah ka Tnat Kam Pule Puthi u la ong ba ka jingsdang ïa ka skhim Model Skill Loan ka long u mawmer ïa ka tnad Skill Development and Entrepreneurship.
U la ong ba kane ka skhim ka pynkupbor ïa ki samla lyngba ka jingai jingkyrshan pisa ban pyntbit ïalade lyngba ka jingai ki ram bym hap buh bynda kiba haduh T 7.5 lak. Ki NBFC, NBFC-MFI, & ki bank ba rit ruh mynta ki lah ban ai ïa kine ki ram. U la ong ba katba ka pyrthei, ba kynthup ruh ïa ka India, ka mad ïa ki jingkylla ba sted ha ki kam teknoloji, ki jingai jinghikai bad ki jaka trei jong ki ruh ki dei ban kylla.
Ka sorkar ka dang trei na ka bynta ka thong na ka bynta u snem 2047, ha kaba ka Sorkar ka la pyrkhat bniah shaphang kine ki jingkylla; kane ka skhim Model Skill Loan ka dei ka jingkylla bad ka jingpyllait kumba la dawa da ki paidbah, u la ong.
Ha ka jingai jingkren jong u ha kane ka sngi, u Atul Kumar Tiwari, Secretary, MSDE u la ong ba ka ïoh ka kot na ki sap ka dei kaba shong ha ka ïew, ha kaba ka jingnang ïa ki kam ba thymmai ka la ïasoh bad ki kam pyntbit ïalade. U la ong ruh ba ki samla na ki jaka sor bad ki jaka ba marjan ïa ki jaka sor ki ïohi ïa ki lad ki lynti ban pyntbit ïalade bad kyntiew ïa ka kamai kajih.
U la ong ba lyngba kane ka sienjam, ki samla ki lah ban jied ïa ki kam bapher bapher ban pyntbit ïalade naduh ki kam ai jingsumar nongpang, IT, AI data science, cloud application, digital marketing, hospitality, animation, gaming, graphic designing, bad drone technology. Kine ki jingai jinghikai, kiba wan namar ki jingkylla ha ki kam, ki wanrah ïa ki lad ïoh kam bad ruh ka lad ban ïoh kam shabar ri, u la ong.
Ha ka jingbym don ka ïew ai ram na ka bynta ka jingkyntiew ïa ki sap, bun ki samla ki bym kotbor ha ka pisa ki shem jingeh bha wat lada ki don sap. Ban pynthikna ka jingtyllun ka pisa ha ki kam pyntbit ïalade bad ban plié lad ïa ki samla ba duna jingkamai ba kin ïoh jinghikai ha ka dor kaba jem.
Ka MSDE ka la sdang ïa ka Credit Guarantee Fund Scheme for Skill Development (CCFSSD) ha u Naitung 2015. Ka skhim Model Skill Loan ba thymmai ka dei ka jingpynkylla ïa kane. Ka pynbeit ïa ki jingeh ha kaba ïadei bad ki jingdonkam ïa ki nongtrei kiba la tbit ha ka kam bad kine ki jingeh ki mih namar ka jingkylla sted ha ki kam teknoloji.
Ha kane ka jingïalang plie paidbah la ïadonlang, u Secretary, Tnat Skill Development and Entrepreneurship (MSDE), Atul Kumar Tiwari; AICTE, u T.G. Sitharam; Senior Economic Advisor, MSDE, u Nilambuj Sharan; ryngkat u CEO, NSDC, bad MD, NSDC International, Ved Mani Tiwari; u Chairman, National Credit Guarantee Trustee Company (NCGTC), Durgesh Pandey, u Deputy CEO, Indian Banks Association, Gopal Bhagat bad u CEO, Eduvanz Financial Services, Varun Chopra.
