Nongpoh, Nailar 05: Hadien ba la pyndep pura 100% ïa ka Special Intensive Revision (SIR), u Deputy Commissioner ka Ri-Bhoi District, u Dr. Abhishek Saini, mynta ka sngi u la pynlait paidbah ïa ki Draft Electoral Roll jong baroh san tylli ki Constituency ha ka District bad aiti ruh sha ki nongmihkhmat jong ki seng saiñ hima bapher bapher.
Ka jingaiti ïa kine ki Draft Electoral Roll ka la long ha ka jingïalang ba la pynlong ha kamra treikam jong u Deputy Commissioner ha Nongpoh, ha kaba la sakhi lang da ki ophisar sorkar ka District, ki Electoral Registration Officers (EROs) jong ki Constituency bapher bapher bad ki nongïalam jong ki seng saiñ hima.
Haba kren sha ki lad pathai khubor, u Dr. Abhishek Saini u la ong ba ka jingaiti ïa ki Draft Electoral Roll sha ki seng saiñ hima kan long ba ki seng saiñ hima kin lah ban peit bñiah ïa ka kyrteng jong ki nongthep vote bad ban ai jingmut lane ban pynpaw ïa kino kino ki jingduna, lada don, shuwa ban pynskhem ïa ka Final Electoral Roll.
U la ong ruh ba kane ka long ka bynta kaba kongsan ban pynthikna ba ka thup kyrteng jong ki nongthep vote kan long kaba biang, bad kaba khuid katkum ki kyndon jong ka Election Commission.
