Ka Meghalaya ka la pynkhreh ïa ka wat ba ar ban ïakren halor u pud bad ka Assam

By Mawphor Editor On Aug 6, 2026

Assam - Meghalaya - Nagaland - Tripura Map Illustration of Indian states

Shillong, Nailar 5 : U Symbud Myntri Rangbah ka jylla u Ma Sniawbhalang Dhar u la ong ba ka jylla Meghalaya ka la pynkhreh ïa ka wat kaba ar jongka jingïakren pynbeit pud bad mynta ka dang ap ïa ka Assam ban thung ïa u Chairman ba thymmai jongka Regional Committee.
“ Ngi dang ap ïa ka Assam ba kan ai jingtip uei u ne ka Chairman jongka Regional Committee jongka. Ki tang shu dep thung ïa u ne ka Chairman ngin sa sdang noh ka jingïakynduh” ong u Ma Sniawbha.
Halor ka kaiphod jong ki shnong kiba hap hapoh ka Block I u Ma Sniawbha ula ong baroh ar ki jylla ki dang pynkhreh ïa ka kaiphod bad shen kin sa aiti sha ki Regional Committee.
“ Ngi la long kiba la pynkhreh. ïa ki kaiphod yn sa pynkhreh na baroh ar ki jylla. Ngan ym ong ba ka long kaba eh hynrei lyngba ka jingïakren sngewthuh jingmut yn lah ban pynbeit ïa kane ka jingeh” ong biang u Symbud Myntri Rangbah.
U la ong ïa kine ki mat la buh hakhmat ki ar tylli ki Regional Committee kiba la thung da ka sorkar Meghalaya bad sorkar Assam. “ Ngi la phah ïa kane ka kam sha ki Commitee bad mynta ka shong ha ki Committee ban shim ïa ka rai halor kane ka kam ïa pynbeit pud” ong u Ma Sniawbha.
Halor ka jingkylli ba ka don ka jingdawa ban pynphai ïa ka Block I sha Meghalaya u Symbud Myntri Rangbah um pat treh ban ong ei ei hynrei u la shu jubab ba ka Meghalaya ka la dep leh ïa ki homework jongka.
“ Ngi la leh ïa kaei kaba ngi dei ban leh, ki ophisar ki la jan dep ïa ka kam. Tang shu dep na ka liang ka Regional Committee jongka jylla kan sa shong bishar bniah shwa ïa ka kaiphod bad hadien kata yn sa ïashong lang bad ka Regional Committee jongka Assam ban ïa pynbeit lang da ka jingïasngewthuh jingmut. ong u ma Sniawbha.
Halor kawei pat ka jingkylli hato ki shnong ba im ba sah da ki paid Khasi Pnar kin wanphai ne em sha ka jylla, u Symbud Myntri Rangbah ula ong ba ki jingtip ba bniah ki dang don bad ki bor synshar District. Baroh ki jingtip ba bniah ki dang don ha kti u DC halor kita ki shnong ba don hapdeng ka jingïakajia, ong u ma Sniawbha.