Mawkyrwat, Nailar 05 : Ka Ophis jong ka Deputy Commissioner (Election), South West Khasi Hills District, Mawkyrwat, ka pyntip sha baroh ki nongshong shnong ba ka la pynmih ïa ka Draft Electoral Roll ba nyngkong hapoh ka Special Intensive Revision (SIR) 2026 na ka bynta ka 35-Ranikor (ST) Assembly Constituency bad 36-Mawkyrwat (ST) Assembly Constituency mynta ka sngi ka 05.08.2026 ha ophis treikam jong ka Deputy Commissioner, South West Khasi Hills District.
Namarkata, ka kong Aitinolin L. Mawlong, IAS, ka pyntip ruh ba ka tarik ba pynbit pynbiang (Qualifying Date) na ka bynta kane ka SIR ka long 01.10.2026.
Shuh shuh ka la ong ba lada ka kyrteng jong kino-kino ki nongthep vote kim don ha kane ka Electoral Roll ba nyngkong, ki lah ban phah ïa ki jingdawa bad jingujor (Claims and Objections) naduh 05.08.2026 haduh 04.09.2026, da kaba pyndonkam ïa ki Form 6, Form 7 bad Form 8, katkum ka jingdonkam.
Ym tangkata, ka la ong ba ka por na ka bynta ka jingpynbeit ïa ki jingdawa bad jingujor (Disposal of Claims and Objections) kan long naduh 05.08.2026 haduh 03.10.2026 bad ka Electoral Roll ba khatduh (Final Electoral Roll) yn sa pynmih ha ka 07.10.2026.
Kumta, ka la kyntu ïa baroh ki nongshong shnong bad nongthep vote jong ka 35-Ranikor (ST) Assembly Constituency bad 36-Mawkyrwat (ST) Assembly Constituency ban peit bniah ïa ka kyrteng jong ki ha ka Electoral Roll ba nyngkong bad ban leh ïa kaba donkam hapoh ka por ba la buh.
Lah ban kdew ba ha ha kane ka sngi jong ka jingsam ïa ka Draft Electoral Rolls for 2026 hapoh ka Special Intensive Revision (SIR) of Electoral Rolls ha South West Khasi Hills District la don lang naduh ki ophisar, ki nongïalam shnong bad kumjuh ruh ki nongïalam party ne ki political party.
