Pyllait paidbah u Bah Kyrmen Shylla ïa ka Music Video ‘Style’

0

Khliehriat, Naiwieng 16 : U bah Kyrmen Shylla, uba dei u myntri ka sorkar jylla bad u MLA jong ka Khliehriat Constituency, mynta ka janmiet, sngi ba ar, u la pyllait paidbah ïa ka Music Video ‘STYLE’ ba la rwai da u samla Shanbor Lastang lem bad ki paralok uba na ka shnong Khliehriat West, ïa ka jingïalang la pynlong ha Khliehriat West Community Hall ha ka jingïa don ryngkat lang ki paidbah bad ki riew rangbah jong ka thaiñ.
Haba kren kum u kongsan, u bah Kyrmen Shylla, u la ai ka jingkhublei kitbok kitrwiang ïa u samla Shanbor Langstang lem bad ki paralok kiba la lah ban pynmih ïa kane ka music video, u la ai mynsiem bad pynshlur ruh ba kin nang ïai kiew shaphrang ha ka sap ka phong ba ki don, ha kajuh ka por u bah Kyrmen, u la kyntu ïa baroh ki paidbah ba kin sngewbha ban pynsaphriang (share) lem ïa kane ka music video ‘Style; jong u samla Shanbor Langstang ba kan long kum ka lad ka lynti ban kyntiew ïa u bad ïa ka kynhun bad ong ba kane ka jingsdang ka long ka nuksa ba bha ïa ki samla ka thaiñ.
Kum u nongmihkhmat jong ka thaiñ, u MLA, u la kyntu ïa ki samla ba don sap ba kin mih shakhmat bad pynsngew ruh ha u ïa kino kino ki jingeh ha kaba na ka liang jong u, katba lah un wad ki lad ki lynti ban ïarap ïa ki ban kyntiew ïa ki sap ki phong, u la kyntu lang ïa baroh ki paidbah ba ki dei ban don ka mynsiem iatreilang ban kyntiew iwei ïa iwei bad kumjuh ruh ban ai lem ïa ka jingkitbok kitrwiang bad ban pyn shlur ïa ki samla kiba don ka sap bad kito kiba la mih shakhmat ha kiba bun ki bynta.
U President rangbah jong ka Jaiñtia National Council, uba dei ruh uwei na ki kaitor na ri lum Jaiñtia, u bah Sambormi Lyngdoh, u la long kum u Symbud kongsan ha kane ka janmiet bad haba kren sha ki paidbah ha ka jingïalang, u la kyntu ba kin sngewbha ban ai ïa ka jingkyrshan kaba pura ïa kane ka music video ‘STYLE” ba la rwai da u samla Shanbor Langstang bad ki paralok bad ong ruh ba lyngba ka jingpeit (view), ka jingpynsaphriang (share) kan long ka jingai mynsiem ïa ka kynhun bad kumjuh ruh kum ka lad kamai pisa, u la ïathuh ruh ba ka jinglah ban pynurlong ïa kane ka music video ka dei ruh ka jingtrei shitom jong ki kaitor.
Utei u nongialam ka EJNC, u la kyntu ïa u bah Kyrmen Shylla ba un sngewbha ban thaw ïa ki rynsan kiba kyrpang na ka bynta ki samla don sap khnang ban kyntiew ïa ki sap ba ki don bad ruh ban wad ki lad ki lynti ban ïarap ïa ki samla ban pynpaw ïa ki sap ki phong ba ki don, namar kumba long mynta ka dang duna palat ki rynsan ïa ki samla ban pynpaw pyrthei ïa ki sap ki phong jong ki.
U MLA ba rim jong ka Khliehriat, u bah Justine Dkhar, u la buh ïa ki kyntien shong sbai ha ki samla don sap da kaba ong “Ka um pohliew kaba rit, katba ka dang tuid ar sut ka kylla long ka wah bah kaba heh’ kane ka long ruh kum ka jing ai mynsiem ïa ka kynhun rwai jong u samla Shanbor Langstang bad ong ruh ba ka rwai ka siaw ka dei shibynta jong ka jingim u briew kaba ha baroh ki por, u la ai ka jingkitbok kitrwiang ïa ka kynhun ba kan nang lah ban ïaid sha khmat bad nang lah ruh ban pynmih shuh shuh ïa ki video music, u la kyntu ïa ki paidbah ba kin sngewbha ban peit bad pynsaphriang lem ïa kane ka video ‘STYLE’.
Kiba la ai jingkren ki kynthup ruh u President jong ka Khasi Students Union East Jaiñtia Hills District, u bah Streamly.S.Suchen, ïa ka prokram la pynïaid da u bah Mebanteilang Sukhlaiñ bad la ïoh ruh ïa ka jingshad na ki ar ngut ki samla ka thaiñ u Nehki Rymbai bad ka samla Riya San, kine ki dei kiba ïa shim bynta ha ka rynsan Jaiñtia Got Talent 2022.

Leave A Reply

Your email address will not be published.