Shillong, Naitung 01: Ka sorkar jylla lyngba ka tnad ki kam jngohkai pyrthei ha ka sngi Thohdieng ka la pyllait paidbah ïa ka Meghalaya Tourism Policy, 2023 da ka thong ba na kane ka tnat kin wan kiba bun ki jingkylla bad ki jingkiew shakhmat ka jylla ha kiba bun ki liang.
Ïa kane ka policy la pyllait da u Myntri Rangbah ka jylla u Conrad K Sangma ha ka jingïadon lang u Myntri ka tnat ki kam jngohkai pyrthei u Bah Paul Lyngdoh ha ka jingïalang ba la pynlong ha State Convention.
“Da ka jingkyrshan ba radbah u Myntri Rangbah ka jylla ngi la ïoh ban pyllait ïa ka Meghalaya Tourism Policy 2023 ha kaba ha kane ka policy ki don ar tylli ki pasoh ba kongsan kata ka jingïohijngai bad ki nongrim bad kaba ar ngi la kdew ïa 10 tylli ki mat kumno ban rah shajrong ïa kane ka kam jngohkai ha ka jylla,” ong u Bah Paul haba kren sha ki lad pathai khubor.
U Bah Paul u la ong ruh ba ka thong jong kane ka Policy ka long kumno ban ai jingkyrshan ïa ki samla khnag ba kin lah ban im ja na kane ka kam kaba la sdang ban kiew sted bha ha ka jylla.
Shuh shuh u la ïathuh ba hadien ka jinglyngshop ka khlam Covid la sakhi ba ka kiew ka jingwan kiba wan jngohkai sha ka jylla ha kaba ki don haduh kumba 15 lak kiba wan shangkai sha ka jylla.
U la ong ruh ba ka kam jngohkai kan dei ka tnat ban pynmih shibun bah ki kam ha ka jylla kaban long kum ka lad ïohkam na bynta ki samla,
“Man u snem ngi pynmih ha ka jylla 60,000 ngut ki samla kiba la pyndep ki jingpule bad lada ngim shim khia ban seng ïa ki kam kiba thymmai bad ban btin lynti ïa ki ha kaban ieng ha la ki kjat da leilei ka reservation policy kan ym lah ban ai kam ïa baroh,” u la ong.
