Pulom ka ophis District Register ban pynrung kyrteng ïa artylli ki jaka tih mar pohkhyndew

Shillong, Lber 16: Ka ophis District Registrar, Tura ka la pulom ban pynrung kyrteng ïa ki jingai wai ïa ki artylli ki jaka tih marpoh khyndew ha kaba kane ka la lam sha ka jinghiar ka khajna ne ka jingpyndep ïa ka kamram bad ka pisa bai pynrung kyrteng kaba dei ban siew T. 32.90 lak.
Ïa kane la pynpaw da ka kaiphod Comptroller and Auditor General of India (CAG) ha ka state revenue na ka snem mang tyngka kaba 31 tarik u Lber, 2023.
Ïa kane ka jingjia la pyntip ruh sha District Registrar, Tura ha u Naiwieng 2022 bad kaba la pyntip ruh sha ka sorkar jylla ha u Naitung 2023.
Ha ka jubab ba la phah da District Registrar ha u Risaw 2023 bad ka copy jong ka jingjubab ba la ïohpdiang na DFO, Tura u Nailur 2023, ha kaba la ong ha ka jingpynbna la ïohpdiang na District Registrar, Tura shaphang ka jinglong jingman ka registration da u Diwan B. Marak ha kaba ïadei bad ka jingai wai ïa ka jaka tih marpoh khyndew.
Hadien ba u Diwan B. Marak um don shuh ha ka 28 tarik u Kyllalyngkot 2020, u khun jong u, u Kember B. Marak, u la pan ban pynkynriah ïa ka Mining Lease ha ka kyrteng jong u, hynrei kane ka jingpynkynriah khlem lah ban pyndep na ka daw ki jingbym biang ki application form.
“Halor kane, ka Mining Lease la pynsangeh. Ha kaba ïadei bad u Manoranjan Sangma, ïa ka jingai wai la pynkynriah sha ka Jenmi Marak ha ka 16 tarik u Naiwieng 2022 na ka daw ka jingkhlad jong u ha ka 31 tarik u Risw 2020. Wat hapdeng kane ïa ka mining lease khlem pat lah satia ban pynrung kyrteng; kumta la phah ïa ka show[1] cause notice sha ka Jenmi Marak da DFO Tura ha ka 25 tarik u Nailur 2023, ïathuh ka kaiphod.
Ka la bynrap ruh na ki jubab ba la ïohpdiang na ka Forest and Environment Department ha u Rymphang 2024 bad ka Excise, Registration, Taxation & Stamps Department ha u ïaïong 2024, ka la pynthikna ïa ki jingshisha kumba la ong da DFO, Tura ha ka jubab kaba u Nailur 2020.
“Ka jubab na ka tnat ym lah ban pdiang satia,” ong ka kaiphod ka CAG da kaba kdew ruh na ki kaiphod jong ki arngut kiba shim wai kaba shibnai, ka royalty disbursement ka transport challan ba la ai ha ka kyrteng u Diwan B. Marak bad u Manoranjan Sangma (Appendix 4.1), la sakhi ba kine kiba shim wai ki la pyntreikam ïa ki jaka tih mar pohkhyndew khlem ka lease registration bad ka payment jong ka stamp duty kaba dei ban ïaid katkum ka Rule 21 ka MMMCR, 2016 bad Section 17 ka Indian Registration Act, 1908.”
“Shuh shuh ïa ki monthly return la ai ha ka kyrteng u Manoranjan Sangma bad ki sam ïa ki royalty la pynlong ha ka kyrteng u Diwan B. Marak, wat ba ïa ka jingai wai khlem pat da register,” ka la bynrap.