Ba mad jingeh bad shah khniot dor ki syiar ba ri ha ka jylla, sha u Myntri pynsngew ka RBPFA

Nongpoh, Lber 17: Ka seng Ri Bhoi Poultry Farmers Association (RBPFA) mynta ka sngi kala leit ban ïakynduh syndon ïa u Bah AL Hek Myntri ba dei peit ïaka tnad Animal Husbandry and Veterinary ban pynthikna ïa ka dor ka mur jong ki syiar kaba dei hadien ka jingshah khniot dor palat jong ki nongri syiar haka them Ri Bhoi bad kaba la pynlong ïa kiba bun ki nongri syiar ban kynran dien namar ka jingbym don ka dor ba biang jong ki syiar ha iew ha hat.
Haba kren sha ki lad pathai khubor hadien ka jingkynduh bad u Myntri, ka kong E Lapang kaba dei ka President, bad u Bah A Diengdoh Vice President ka RBPFA haka jingdonlang ki dkhot, ka la ong ba ka jingleit kynduh jong ki ïa u Myntri ba peit ïaka kam ri jingri ka long ban pynangew ïaki jingeh ha kaba ïadei bad ka dor jong ki syiar bad hakajuh ka por ban dawa ruh naka sorkar ban mang da ki kynja subsidy ha kaba ïadei bad u jingbam syiar kaba ki shah ktah na ka jingrem palat ka dor jingbam.
Kitei ki nongïalam kila ong ruh, ha kaba ïadei bad katei ka mat kaba ki la rah syndon sha u myntri sorkar, u Myntri sorkar ka jylla ba dei peit ïa ka mrad, u la kular ban shimkhia ban lum da ka jingïalang jong ki nongri syiar baroh ha ka jylla ban pynbeit ïa katei ka kam kaba ktah ïa ki nongri syiar hapoh ka jylla.
Shuh shuh, kitei ki nongïalam ki la ïathuh ruh ka seng ka la pynsgewruh sha u myntri sorkar halor ka jingwan tuid ki syiar na shabar ka jylla bad kaei kaba ki la ioh jubab ka long ba ka sorkar ïa mynta ka la pynsangeh ïa ka jingwan poi ki syiar na shabar ka jylla na ka daw ka jingdon ka khlam ïap syiar ha kiwei ki jylla.