Kner jingïarap ka HYC sha ka longïing ba ïakynduh ïa ka jynjar sat

Nongstoiñ, Lber 17: Ka Hynñiewtrep Youths Council Lai Lyngdoh Circle hapoh ka jingïalam u Samla Wandappynkmen Marweiñ President bad Samla Presslanroy Thongni Assistant General Secretary, ryngkat ka jingsynran lang u Samla Lumlang Kharsyiemlieh President HYC West Khasi Hills District lem bad ki dkhot, ki la hiar ha ka shnong Marshan Namlang ban leit jngoh ryngkat ka jingïarap da u khaw ki marbam bad ki blanket lem bad ki jingduwai ïa ka ïing ka sem u Malieh Chedral Lyngkhoi, ka longïing kaba mad ïa ka jynjar sat.
U Malieh Chedral Lyngkhoi 50 snem tam ei ei u sumar ïa lai ngut ki khunswet wat u la noh ka karta. Ka para jong u Malieh Chedral Lyngkhoi, ka Thiansy Lyngkhoi ka la khlad noh ha u snem 2020 bad iehnoh ïa ki lai ngut ki khunswet. Uwei u shynrang u ba don ka jingshitom thiah pang la slem bad ki ar ngut ki kynthei kiba shitom. Hynrei la ïarap sumar bad shimti da ki jaka ri khunswet la ar snem ei ei. Kawei ha Shillong kawei ha Nongpyndeng ban sumar bad phah skul ïa kita ki ar ngut ki kynthei namar kine ruh ki bun ki shitom.
U Malieh Chedral Lyngkhoi u la ïathuh ba naduh ba khlad ka kmie u hap sumar ïa kitei ki khunswet bad ka long kaba sohsat shisha ïa ka ïing ka sem, namar ki don ki kmie nah kmie san, hynrei haba ïa duk ïa jynjar kajuh, ta ka daw u hap shim jingkitkhlieh hi.
U la ïathuh ba u hap ban lilam lut naduh ki jingri masi ki blang ki jaka puta, tang ban pynbiang bai dawai ïa ki. U la ong naduh snem ei ei naduh ba la wan shimti ïa ki ar ngut ki kynthei ba ri khunswet u lah kham sngew sting shisha. Hynrei namar u ta u shynrang u ba la samla ruh u dap tang ka shitom bad haba la ïalam wad dawai kylleng, hynrei bun ym ïadei bad la hap ban lilam noh ïa baroh ki jingdon jingem.
Ha ka jingaiti ïa ki tiar ka HYC Lai Lyngdoh Circle lyngba u samla Lumlang Kharsyiemlieh President HYC West Khasi Hills District ryngkat ka jingkren shikyntien arkyntien, u la ong hadien ba ki la ïoh sngew da la ki shkor bad ïohi da la ki jong ki khmat. Kumta kum ka seng ka wan ban noh tang kiba rit eh, hynrei ka kitbok lem hapdeng kita ki jinglanot.
Ka seng ka kyrpad ïa ki paradoh parasnam, para thaiñ ban ïarap lem ïa kane ka longïing kaba mad ïa kane ka jingeh. Ka seng ka ai khublei ïa ka ïing ka sem bad ka kyrmen ba U Blei un ïarap hapdeng kane ka jingeh kaba ki mad.