Yn pynlong ïa ka 7th Act East Business Show ha Shillong yn wan ïashim bynta 12 tylli ki Ri

Shillong, Lber 17 : Ki nongmihkhmat na ki 12 tylli ki ri ka pyrthei kin wan ïashim bynta nalor ki nongkynshew kam na kylleng ki Jylla ka Ri ha ka Act East Business Show ba Hynniew ha Shillong ban ïawad ïa ki lad ïatreilang bad kynshew kam.
ïa kane ka prokram la pynlong da ka Indian Chamber of Commerce ha ka jingïatreilang bad ka Sorkar Meghalaya, ka ban sdang naduh ka 25 haduh 27 tarik Lber, da ka jingthmu ban pynkhlaiñ ïa ka jingïadei ha ka kam khaïi pateng hapdeng ki Ri BBIN bad ASEAN, haba pynleit jingmut ïa ki kam kum ka Technology, Agriculture, Tourism bad kiwei kiwei.
ïa kane ka jingialang yn plie da u Myntri Rangbah ka Jylla u Conrad K Sangma ha ryngkat ki Heh Ophisar na ka Sorkar India bad ki heh ki haiñ jong kiwei ki Ri. Kane ka prokram kan wanrah ha kajuh ka jaka ïa ki nongseng karkhana, ki nonthaw policy, bad ki stad ki jhad ba kin ïakren halor ki lad kynshew kam ha Meghalaya.
Ki heh ki haiñ jong kiwei ki Ri ba kynthup ïa kiba na Philippines, Germany, Indonesia, Cambodia, UAE, Japan, Bangladesh, Bhutan bad Nepal, kila pynthikna ïa ka jingwan ïashim bynta nalor ki nongsengkam sengjam jong kitei ki Ri. Ki nongseng kam sengjam na India ruh kin wan ban ïashim bynta ban peit ïa ki lad seng kam ha Meghalaya.
Kane ka prokram kan pynleit jingmut ha ki lai bynta kata ban pynkupbor ïa ka jingkiew shaphrang lyngba ki Technology bad ki buit treikam ha Meghalaya, ban pynlong ïa ka Thaiñ Shatei Lam Mihngi ka Ri India kum ka Export Hub ki mar rep mar riang, ki jingri jingdup, ka food processing bad ka North East Travel, Tourism & Hospitality.
Ha kine ki lai sngi, ka business show kan pynlong ka jingïalang B2B bad B2G, ka jingïakren ban ïasengkam sengjam lang, ka lad ka lynti ban ïatreilang, ka kam shalan mar, ka sengkam thymmai, ka Producer Organisation (FPO) bad kompani (FPC) ha Meghalaya.