Riangdo: Ka Meghalaya Youth Federation Mawshynrut Circle, ha ka sngi nyngkong jong ka taiew hapoh ka jingialam jong u President Bah Pynshai Kharbani bad u Publicity Secretary Bah Raplang Synshiang, ki la leit ban jurip ïa ka surok kaba na Riangdo sha Mawthengkut.
Kane ka surok ka dei kaba la shna na ka skhim PMGSY bad ka dei ruh kaba dang shu dep shna dang shen. Hynrei ka seng ka la lap pynban ba kane ka surok mynta ka la sdang ban pra ha kiba bun ki jaka. Na ka liang ka seng ka la leit ban ïakynduh bad buh jingthoh sha u SDO ka tnad PWD Mawshynrut, ban dawa ban siang biang ïa katei ka surok, namar ka seng kam kwah ïa ka jingleh torti ïa kane ka surok kaba donkam na ka bynta ki paidbah.
