Nongstoiñ, Nohprah, 15: Ka HYC Nongjri unit ha ka sngi saitjaiñ lyngba ka jingïalam u President Samla Spilin Wanniang, ka la ïoh ban leit jurip ïa ka surok na Nongjri sha Misei kaba 7.322 km bad ka sanction kaba kot sha ka 5 klur tam ei ei bad kane ka surok ka la dep ban pyntrei. Hynrei, katkum ka jinglap jong ka HYC, kane ka surok ka la jot bad bad pra baroh shilynter lait tang ha ki katto katne ki jaka, ha kaba ïadei bad ka jingmaramot.
Ka seng ka la kyntu ruh ïa ki nongtrei bad ïa u contractor ba un leh bha katkum kaba la man bad leh kham janai. Lada kim leh katkum ka jingdawa ka seng kan sa jam pat sa sha kiwei pat ki bynta.
Kumjuh ruh na ka liang ka seng HYC ka la kyrpad sha ki paitbah ki samla jong kane ka thaiñ, khamtam ki nongïalam shnong bad kiwei ba kin mih shakhmat, lada lap ïa kum kine ki jingeh jong ka dong ka thaiñ.
Kane ka surok PMGSY ka dei ka surok kaba ïasoh ha bun tylli ki shnong kum ka Mawdonglang Borkhe Misei bad kiwei kiwei de. Ka dei ka surok kaba kongsan bha namar ka poi ruh sha khappud ka East Garo Hills.
