Ha ka Dorbar ki Soo Langdoh ha madan Lariang la pynbna ïa ki sngi Behdieñkhlam 2025

Jowai, Nohprah, 15: Ka Dorbar ki Soo Langdoh kaba la long ha madan Lariang, Ïalong kawei na ki Dorbar ba kyrpang jong ki shakri Ñiam hapoh ki Soo Raij-Soo Langdoh bad ka long ruh ka dustur ban hikai ñiam ha ka jingïalam khmat u Dolloi kum u khlieh ka Ñiam bad u Khlieh ka Elaka.
Ïa kane ka Dorbar ki Soo Langdoh la pynlong ha kane ka 15 tarik u Nohprah nalor ki shakri ñiam jong ki Soo Raij-Soo Langdoh la wan sakhilang da ki nongïalam ka Seiñraij kynthup ïa u ma O.H. Toi, President Seiñraij Jwai, ma Pyrkhat Shylla, President Seiñ Raij Ïalong, ma Ker Lakiang, General Secretary Seiñraij Chyrmang bad u H. Phawa na Seiñraij Tuber, ki longkmie kilongkpa bad ki khun samla.
U Pator ka Raij Jowai waheh Raymond Nartiang kum u Chongknor jong ka Dorbar ula ai ki kyntien pdiang burom bad ka jingpynbna ïa ki taïew jong ka Shad Ñiam Behdieñkhlam 2025, ha kaba ka Raij Chyrmang ka Shad Ñiam Behdeiñkhlam kan long ha ka sngi Mulong 1 tarik Jymmang, ha Raij Jowai ka sngi pynkut ïa ka Shad Ñiam Behdieñkhlam kan long ha ka Muchai 14 tarik u Naitung, ha Raij Tuber ka sngi pynkut ïa ka Shad Niam Behdeiñkhlam kan long ha ka Muchai 22 tarik Naitung, katba ha Raij Ïalong ka sngi pynkut ïa ka Chad Ñiam Behdieñkhlam kan long ha ka sngi Muchai 7 tarik Nailar, 2025.
U Doloi ka Elaka Jawai Wh. Puramon Kynjin ha ka jingkren ula pynpaw ka jingsngewnguh ïa ki Soo Langdoh kiba la trei shitom ban pyndep ïa ka kam ñiam kam rukom hala ki jong ki Raij bad ki shnong, khnang ban im ka ñiam ka rukom, ka dustur ka riti kaba long pateng la pateng.
La ïoh ïa i suit i chor bad ka nguhblai nguhsyiem da ki Soo Langdoh ryngkat u Dolloi, ki wasan waheh bad ka jingkren kyntu kynphang halor ki Phang bapher na u Myown Chyrmang, Kñi ka Raij Jowai ula kren shaphang “I Lam Dong” u Jadeja Dkhar, Maji ka Raij Tuber halor ka phang “I kitkhia ya ki kam ñiam, ïow suk u saiñ ka Raij ka Chnong”, u Pyrkhat Shylla, President Seinraij Tuber halor ka phang “I kreh bha ki nongkrehniam ku ka ñiam ka rukom” katba u Ker Lakiang, General Secretary, Seiñraij Chyrmang halor ka phang “I dor wa ka nongrim ka yutang kñia pyrthat”.
Ha kane ka sngi ka Dorbar u Dolloi ula pynsngew hakhmat ka Dorbar ïa ka dustur riti jied Langdoh, Pynkyntang Langdoh ha kaba ka sur kiba bun kila rai ba ki Soo Langdoh-Soo raij baroh ki dei ban ïakren ban phylliew jingmut lang ha manla ki Shnong ki Raij khnang ban ïoh phah sha ka JHADC ban pynrung hapoh ka Customary Law na ka bynta ban ïada ïa ka pateng ban wan.