Shillong, Nailur 01: Ka khubor ba la ïoh na ki pulit la ïathuh ba uwei u rangbah ba la 30 snem ka rta u la pom ïa baroh artylli ki kti jong ka kurim lajong tang namar ka jingïakynad kam pohïing.
Kane ka la jia ha ka miet jong ka 29 tarik u bnai ba la dep ha Cachar district Assam. Ka khubor ka iathuh ruh ba katei ka jingjia ka la jia ha ka thaiñ Dholai jong ka Cachar District.
Ka khubor na ki pulit ka ïathuh ruh ba une uba shah kynnoh ba pom ïa ki kti jong ka kurim la tip kyrteng kum u Rafique Uddin.
“U Rafique Uddin u la pyndonkam da ka wait ban pom ïa baroh artylli ki kti jong ka kurim ka Rubi Begum (25 snem) hadien ka jingïania halor ka jingkynnoh ba ka kurim ka don lok shawei,” ong ka khubor na ki Pulit.
Shuh shuh la ïathuh ba kane ka longkmie ka dang don mynta hapdeng ka jingsumar ha Silchar Medical College and Hospital bad na ka liang jong ki pulit ruh ki dang pynlong ïa ka jingtohkit ha kaba ïadei bad kane ka jingjia.
“Ki ju ïania jan man ka sngi khlem daw. Ka jinglong jingman ka la kylla long kaba shyrkhei hynnin ka miet. Ngi la ïohsngew ïa ka jingpyrta jong katei ka kynthei bad ngi la mareh sha ïing. Ngi la ïohi ïa ka ba ka la mynsaw jur. Ka la ïathuh ïa ngi ba u tnga jong ka u la pom ïa ki kti jong ka,” ong uwei u para marjan.
La ïathuh ba u kurim u la phet krad noh na katei ka jaka hadien katei ka jingjia.
